კომენტარი

მარგველაშვილ-უსუფაშვილის ერთიანი თამაშის მცდელობა თუ იქნა, უსუფაშვილი შეცდომას დაუშვებს - ხათუნა ლაგაზიძე

ექსპერტი ხათუნა ლაგაზიძე მიიჩნევს, რომ პარლამენტის თავმჯდომარე დავით უსუფაშვილმა თუ პოლიტიკური ნარჩენების შემოკრება დაიწყო, ის საინტერესო არ იქნება.

როგორც ექსპერტმა პრესკონფერენციაზე აღნიშნა, უსუფაშვილს წარმატებული პოლიტიკური კარიერის პერსპექტივა აქვს, თუ შეცდომებს არ დაუშვებს.

“დავით უსუფაშვილი იმ დროს რომ წასულიყო „რესპუბლიკური პარტიიდან“, როცა ამას სთავაზობდნენ, ახლა მისი სახით ახალი პარლამენტის თავმჯდომარე გვეყოლებოდა. იქნება მცდელობა, რომ დაიწყოს მარგველაშვილ-უსუფაშვილის და „თავისუფალი დემოკრატების“ ერთიანი თამაში. ეს თუ ასე მოხდა, უსუფაშვილი შეცდომას დაუშვებს. მან არ უნდა დაიწყოს პოლიტიკური ნარჩენების შემოკრება. ასეთ შემთხვევაში ის არ იქნება საინტერესო“,-განაცხადა ლაგაზიძემ.

მისი თქმით, არ არის გამორიცხული, რომ დავით უსუფაშვილმა თბილისის მერობისთვის იბრძოლოს.

„უსუფაშვილი არის თბილისის მერობის მიმზიდველი ფიგურა, თუ ის შეძლებს საღი საზოგადოებრივი ძალების გაერთიანებას. ჯერჯერობით არ ჩანს ამ არჩევნებში „ქართული ოცნების“ კონკურენტი. მართალია, მძიმედ გაჰყვება მის პოლიტიკურ კარიერას საბურთალოს წაგება, მაგრამ მას შეუძლია გონივრული პოლიტიკური სვლით ყველაფერი შეცვალოს“,-აღნიშნა ლაგაზიძემ.

შეგახსენებთ, რომ დავით უსუფაშვილმა რესპუბლიკური პარტია 29 ოქტომბერს დატოვა.

მონიკა დავლაინიძე