პოლიტიკა

დავით უსუფაშვილმა რესპუბლიკური პარტია დატოვა

საქართველოს პარლამენტის თავმჯდომარემ დავით უსუფაშვილმა გავრცელებული ინფორმაცია რესპუბლიკური პარტიის დატოვების შესახებ, დაადასტურა.

უსუფაშვილმა ამ გადაწყვეტილების მიზეზად პარტიის მომავალ საქმიანობაზე მისი გუნდის სხვა წევრებისგან განსხვავებული შეხედულებები დაასახელა. უსუფაშვილის თქმით, ის გააგრძელებს ოპოზიციურ საქმიანობას.

,,ინფორმაციამ, რომელიც ორშაბათს უნდა გამხდარიყო ცნობილი, დღეს გაჟონა და ამისთვის მე განსაკუთრებით ვწუხვარ, რომ რესპუბლიკური პარტიის წევრები, ეროვნული კომიტეტის წევრები მედიის საშუალებით შეიტყობენ ამ ამბავს. არადა, პარტიის თავმჯდოამრესთან ერთად ჩვენ ცოტა სხვა პროცესი გვქონდა დაგეგმილი.

დიახ, მე ვადასტურებ, რომ მივიღე ადამიანურად ძალიან მტკივნეული, მაგრამ პოლიტიკურად აუცილებელი გადაწყვეტილება რესპუბლიკური პარტიის დატოვების შესახებ. მე ვაგრძელებ აქტიურ პოლიტიკურ საქმიანობას ოპოზიციურ ველზე, მაგრამ ეს უკვე იქნება ცოტა სხვა ტიპის საქმიანობა და არა რესპუბლიკურ პარტიასთან ერთად საქმიანობა.

ჩემი გადაწყვეტილება განაპირობა იმ ფაქტმა, რომ პარტიის მომავალი საქმიანობის შესახებ პარტიის თავმჯდომარეს, მის დამფუძნებლებს, სხვა ლიდერებს აღმოაჩნდათ ისეთი პოლიტიკური, ღირებულებითი, ტაქტიკური ხედვები, რომლებიც ჩემთვის არის მიუღებელი, მაგრამ ამასობაში, მე მათ რეალიზებას პარტიაში არ და ვერ შევეწინააღმდეგები~, _ განაცხადა უსუფაშვილმა ბრიფინგზე.