სამართალი

მანჰეტენის ფედერალურმა სასამართლომ ე.წ. კანონიერ ქურდ რაჯდენ შულაიას 45 წლით თავისუფლების აღკვეთა მიუსაჯა

მანჰეტენის ფედერალურმა სასამართლომ ე.წ. კანონიერ ქურდს, 41 წლის რაჟდენ შულაიას (იმავე რაჟდენ პიტერსკის) 45 წლით თავისუფლების აღკვეთა მიუსაჯა. ამის შესახებ ბიბისის რუსული სამსახური იუწყება.

ნიუ-იორკის სამხრეთ ოლქის პროკურატურამ შულაია აღწერა, როგორც „ ნიუ-იორკში აღმოსავლეთ ევროპული დანაშაულებრივი ჯგუფის მთავარი ბოსი“ და ითხოვდა მისთვის 65 წლით თავისუფლების აღკვეთას. განიხილებოდა, რომ ე.წ. კანონიერი ქურდისთვის სამუდამო პატიმრობა მიესაჯათ.

ამის მიუხედავად, მოსამართლე 45 წლიანი პატიმრობით შემოიფარგლა, რომლიდანაც შულაიას დაახლოებით სასჯელის 15%-ს შეუმცირებენ სამაგალითო ქცევის შემთხვევაში. სასჯელის მოხდის შემდეგ შულაია რუსეთში იქნება დეპორტირებული. შულაიას ნაცნობის ინფორმაციით, რაჟდენ პიტერსკი სამშობლოდან შესაძლო თავდასხმის გამო გაიქცა.

ცნობისთვის, მიმდინარე წლის ივნისში ნიუ-იორკის შტატის სასამართლომ რაჟდენ შულაია დამნაშავედ ცნო ხუთი მუხლით. მას ბრალად ედებოდა დანაშაულებრივი ჯგუფის შექმნა ნიუ-ჯერსიში, ასევე რეკეტი, ნარკოვაჭრობა, აზარტული თამაშების არაკანონიერი ორგანიზება, ძარცვა.