პოლიტიკა

მანანა კობახიძეს ადამიანის უფლებათა დაცვის კომიტეტის თავმჯდომარეობა არ სურს - თემურ ჭკუასელი

,,ქართული ოცნების“ წევრის თემურ ჭკუასელის განცხადებით, მანანა კობახიძეს ადამიანის უფლებათა დაცვის კომიტეტის თავმჯდომარის პოსტზე მუშაობას სთავაზობენ, თუმცა კობახიძეს ამ პოსტის დაკავება არ სურს. ამის შესახებ ჭკუასელმა დღეს გამართულ პრესკონფერენციაზე განაცხადა და აღინიშნა, რომ მანანა კობახიძეს განაწყენების საფუძველი აქვს.

,,მანანას შეიძლება ჰქონდეს განაწყენების მომენტი, მაგრამ მას ამის შესახებ პოლიტსაბჭოზე არ უსაუბრია, მან უბრალოდ დაასაბუთა თუ რატომ არ უნდა აღნიშნული კომიტეტის თავმჯდომარის პოსტი.

მე ვეთანხმები მანანა კობახიძის მოსაზრებას, ის მთელი თავისი ცხოვრება ისედაც იყო ადამიანის უფლებათა დამცველი და არ სჭირდება თანამდებობა, რომ ეს გააგრძელოს. საერთოდ, ძნელია ბოლომდე იმის განსაზღვრა, თუ რატომ ამბობს უარს, მაგრამ როგორც ჩანს, მასზე ძალიან იმოქმედა მის ოჯახთან დაკავშირებით აგორებულმა კამპანიამ და ამან ყველაფერს დაღი დაასვა. ის პროკურატურაშიც დაიბარეს დაკითხვებზე, მართალია, არაფერი გამოიკვეთა და ბოდიშიც მოუხადეს, მაგრამ ეს ყველაფერი არ მოეწონა, გულნატკენია ყველაფერი ამისგან.

მის გადაწყვეტილებას პატივი უნდა ვცეთ. გუშინ მას სთხოვეს რამდენჯერმე, მაგრამ საბოლოო გადაწყვეტილება მიღებული ჯერ არ არის, კიდევ ელოდებიან“, - განაცხადა თემურ ჭკუასელმა.

მარი ნამგალაძე