პოლიტიკა

მან გააკეთა ძალიან მკაფიო და გასაგები განცხადება. გამგები გაიგებს - ირაკლი კობახიძე

საქართველოს პარლამენტის თავმჯდომარის, ირაკლი კობახიძის განცხადებით, საქართველო სეკულარული სახელმწიფოა, რასაც ადასტურებს კონსტიტუცია და ეკლესიასთან გაფორმებული კონკორდატი. ამის შესახებ მან პარლამენტის რიგგარეშე სხდომაზე ისაუბრა.

კობახიძის თქმით, პრემიერ-მინისტრის განცხადებას სეკულარიზმთან დაკავშირებით „გამგები გაიგებს“.

„საქართველოს აქვს მოქმედი კონსტიტუცია, მოქმედი კანონმდებლობა, მათ შორის, კონსტიტუციური შეთანხმება, რომლითაც არის სათანადოდ მოწესრიგებული სახელმწიფოსა და ეკლესიის ურთიერთობა. ეს არის ერთი ხაზგასასმელი საკითხი. რაც შეეხება ევროკავშირთან სეკულარიზმის დაკავშირებას, ევროკავშირში არის ქვეყნები, სადაც არ არის განმტკიცებული სეკულარიზმის პრინციპი, არასეკულარული სახელმწიფოები და ისინი მაინც არიან ევროკავშირის წევრები. შესაბამისად, რა კავშირშია სეკულარიზმი ევროკავშირში გაწევრიანებასთან, არის გაუგებარი. რაც შეეხება საქართველოს, საქართველო არის სეკულარული სახელმწიფო. ეს დადგენილია კონსტიტუციით, დადგენილია კონკორდატით. რაც შეეხება პრემიერის განცხადებას, მან გააკეთა ძალიან მკაფიო და გასაგები განცხადება. გამგები გაიგებს, ვისაც არ უნდა გაგება, ის, ბუნებრივია, ვერ გაიგებს ამ ყველაფერს“, - განაცხადა კობახიძემ.

შეგახსენებთ, კვირას სოფელ სნოში, საპატრიარქოს მიერ ახალი სასტუმროს გახსნაზე პრემიერ-მინისტრმა გიორგი კვირიკაშვილმა განცხადა, რომ „საქართველოში სეკულარიზმი თავისი კლასიკური გაგებით უადგილოა“.

ანა მებურიშვილი