პოლიტიკა

მამუკა ბახტაძემ თბილისის შემოვლითი რკინიგზის პროექტს „კონტპროდუქტიული და რეტროგრადული“ უწოდა

საქართველოს პრემიერ-მინისტრის, მამუკა ბახტაძის განცხადებით, თბილისის შემოვლითი რკინიგზის პროექტის შეჩერება ობიექტურად მოხდა, რადგან ეს პროექტი არ პასუხობდა არანაირ სტანდარტს. ამის შესახებ პრემიერმა „მწვანე პოლიტიკა -ეკოტრანსპორტი“ პრეზენტაციაზე თქვა.

ბახტაძის შეფასებით, პროექტი იყო „კონტპროდუქტიული და რეტროგრადული“. მისივე თქმით, რკინიგზის პროექტს ძალიან მნიშვნელოვანი საინჟინრო ნაკლოვანებები ჰქონდა.

„აღნიშნული პროექტი ითვალისწინებდა, რომ ყველაზე მწვანე ტრანსპორტი უნდა გადაგვეტანა ქალაქიდან და მის მაგივრად შეგვექმნა დამატებითი ავტომაგისტრალები ჩვეულებრივი ავტომობილებისთვის. ბუნებრივია, ეს არის სრულიად მიუღებელი.

ჩვენ გვქონდა საერთაშორისო დასკვნები, რომლის მიხედვითაც, ამ პროექტის დამთავრება არსებული დიზაინით იყო სრულიად მიუღებელი. შესაბამისად, ჩემი მთავარი ხედვა გახლდათ, ჩვენ მოგვეხდინა ის, რაც გააკეთა ბევრმა ევროპულმა ქვეყანამ წარმატებით. მოგვეხდინა რკინიგზისა და მეტროს ინტეგრირება ყველაზე ეფექტური საშუალებით. შემოვლითი რკინიგზის ინფრასტრუქტურას ჩვენ გამოვიყენებთ და ავაშენებთ ახალ მეტროსადგურებს სამგორიდან ლილოს მიმართულებით. ეს არის ძალიან მნიშვნელოვანი პროექტი, რომელიც დამატებით სიცოცხლეს მოიტანს ჩვენს დედაქალაქში. ამასთან ერთად, მოგეხსენებათ, რომ თბილისის აგრომელაციაც ვითარდება და პერსპექტივაში, მომავალში ქალაქი რუსთავი მოვაბათ თბილისის მეტროს. ეს არის მართლაც ისტორიული მნიშვნელობის პროექტი“, – განაცხადა პრემიერმა.