პოლიტიკა

მამუკა ბახტაძე ეკოომბუდსმენის თანამდებობას შემოღების ინიციატივით გამოდის

ახალი სამთავრობო პროგრამის „თავისუფლება, სწრაფი განვითარება, კეთილდღეობა“ მიხედვით, მთავრობა ეკოომბუდსმენის ინსტიტუტის შემოღებას გეგმავს.

სამთავრობო პროგრამაში, რომელიც პრემიერ-მინისტრობის კანდიდატმა მამუკა ბახტაძემ პარლამენტს წარუდგინა, აღნიშნულია, რომ ეკოომბუდსმენის ინსტიტუტი გახდება სექტორებს შორის მნიშვნელოვანი გარემოსდაცვითი საკითხების განხილვის პლატფორმა, ისარგებლებს მაღალი ნდობით როგორც სამთავრობო უწყებების, ისე ბიზნესსექტორისა და საზოგადოების მხრიდან. კერძოდ, იგი იქნება ერთგვარი გარანტი გარემოს დაცვის საკითხებზე მთავრობის, საზოგადოებისა და ყველა დაინტერესებული მხარის აქტიური თანამშრომლობისთვის.

„ეს საქართველოში მწვანე ეკონომიკის განვითარების ძალიან მნიშვნელოვანი წინაპირობა იქნება. სწორედ მწვანე ეკონომიკა იქნება 21-ე საუკუნის მთავარი ტრენდი და ჩვენ, როდესაც გვაქვს ასეთი დიდი პირობა, აუცილებლად უნდა გამოვიყენოთ ეს შანსი და ეკონომიკური პერსპექტივის მიუხედავადაც, არ უნდა დაგვავიწყდეს, რომ ჩვენ ვართ პასუხისმგებელი მომავალი თაობის წინაშე, რომ შევუნახოთ მათ ის უნიკალური ბუნება, რომელიც ჩვენი წინაპრებისგან მემკვიდრეობით გვერგო“, – განაცხადა მამუკა ბახტაძემ.