პოლიტიკა

„მამები სიმართლისთვის“ - შვილმოკლული მამები „ქართული ოცნების“ ოფისისკენ მსვლელობას მართავენ

შვილმოკლული მამებისა და მათი მხარდამჭერების მსვლელობა სახელწოდებით „მამები სიმართლისთვის“ „ქართული ოცნების“ ოფისის მიმართულებით დაიწყო. აქციის მონაწილეები სახელმწიფო უსაფრთხოების სამსახურის ხელმძღვანელის ყოფილი მოადგილის, სოსო გოგაშვილის დასჯას ითხოვენ.

მათი განცხადებით, სწორედ გოგაშვილი ხელმძღვანელობდა სპეცოპერაციას, რომელის პანკისში გასულ წელს ჩატარდა და რომელსაც 19 წლის თემირლან მაჩალიკაშვილის სიცოცხლე ემსხვერპლა.

მოკლული თემირლან მაჩალიკაშვილის მამა, მალხაზ მაჩალიკაშვილი მომხდარში კონკრეტულ პირებს ადანაშაულებს და აცხადებს, რომ მისი შვილი სპეცრაზმის წარმომადგენლებმა მძინარე მოკლეს.

„ჩვენ მოვითხოვთ, რომ არა მხოლოდ სოსო გოგაშვილი, არამედ მთლიანად სუს-ის მაღალჩინოსნები იქნან პასუხისგებაში მიცემული და იქნას ყველა დასჯილი იმ სპეცრაზმელებთან ერთად, ვინც ეს სიხლიანი ტერორისტული აქტი ჩაიდინა ხეობაში, ჩემს ოჯახში“, - განაცხადა მაჩალიკაშვილმა.

საპროტესტო მსვლელობის მონაწილეები უკვე დაიძრნენ როსტომ მეფის სასახლის მიმართულებით, სადაც ამ წუთებში კიდევ ერთი საპროტესტო აქცია იმართება. იქ საფინანსო კომპანია „საქართველოს“ დაზარალებული კრედიტორები არიან შეკრებილები.

მმართველი პარტიის ოფისთან სამართალდამცავები არიან მობილიზებულები.