პოლიტიკა

მამაკაცის ტანსაცმელში ჩაცმული მასხარა ხარ! - რიმა ბერაძე ლევან ხაბეიშვილს

„მასხარა ხარ, როგორც მთელი საქართველო გეძახის“, – ასე მიმართა თბილისის საკრებულოს უმრავლესობის წევრმა რიმა ბერაძემ კომისიების გაერთიანებულ სხდომაზე საკრებულოს ფრაქცია „ნაციონალური მოძრაობის“ წევრ ლევან ხაბეიშვილს.

„მატყუარა, მასხარა ხარ, როგორც მთელი საქართველო გეძახის. მამაკაცის ტანსაცმელში ჩაცმული მასხარა ხარ“, – განაცხადა ბერაძემ.

როგორც ხაბეიშვილმა აღნიშნა, ბერაძის გაღიზიანება გამოიწვია იმ ფაქტის გახსენებამ, რომ მას „ქართული ოცნების“ კოორდინატორმა უჩივლა.

„მქონდა კონსტრუქციული კითხვები, რომლებზე პასუხის ნაცვლად მივიღეთ, მათ შორის, ქალბატონი რიმას ისტერიკა. რატომ ჩავარდნენ ისტერიკაში? რიმა ბერაძის აგრესია გამოიწვია იმან, რომ გაახსენდა, პასუხები არ აქვთ და რომ „ქართული ოცნების“ კოორდინატორმა რამდენიმე დღის წინ უჩივლა. „რუსთავი 2“-ზე გავიდა სიუჟეტი, სადაც ბერაძეს მისი კოორდინატორი პირდაპირ ადანაშაულებს კონკრეტული მიწის ნაკვეთის ჩამორთმევაზე. თურმე ჩემი ბრალი ყოფილა, რომ თავისმა კოორდინატორმა დაადანაშაულა“, – განაცხადა ხაბეიშვილმა.

თბილისის საკრებულოს კომისიებმა დედაქალაქის 2019 წლის ბიუჯეტის პროექტის განხილვა დღეს დაიწყეს. დეპუტატებმა პროექტი უკვე განიხილეს და დადებითი შეფასება მისცეს იურიდიულ საკითხთა და ადამიანის უფლებათა დაცვის, ასევე სახელდებისა და სიმბოლიკის გაერთიანებული კომისიების სხდომაზე.