სამართალი

მამა გიორგი მამალაძე აპირებს ამ რისკზე წასვლას - გიორგი ფანცულაია

ე.წ. ციანიდის საქმეზე ბრალდებულ დეკანოზ გიორგი მამალაძის ადვოკატის, გიორგი ფანცულაიას განცხადებით, დეკანოზის ოჯახის წევრებისთვის დაცვის მოხსნა სარისკო ნაბიჯია.

როგორც ადვოკატმა ჟურნალისტებს განუცხადა, დაცვის მოხსნა დეკანოზის ოჯახის უსაფრთხოებას კითხვის ნიშნის ქვეშ აყენებს.

“მამა გიორგი მამალაძე აპირებს ამ რისკზე წასვლას. მართალია რისკია და შეიძლება მსხვერპლიც კი იყოს ეს ნაბიჯი მისთვის იმ გაგებით, რომ მისი ოჯახის უსაფრთხოებას კითხვის ნიშნის ქვეშ აყენებს. ნამდვილად არის დღესაც საჭირო მისი ოჯახის უსაფრთხოების დაცვა, ვინაიდან ის არის უკანონო პატიმარი წინასწარ პატიმრობაში და საზოგადოებასთან ვერ ახდენს კომუნიკაციას. ადვოკატებს გაუთქმელობის ვალდებულებას არ გვიხსნიან და მაღალი იერარქიის სასულიერო პირები არ შემოდიან და მის პოზიციას არ ისმენენ. რჩება ერთადერთი გზა, რომ სასამართლოდან გაიგოს ხალხმა სიმართლე. აქედან გამომდინარე, სასამართლოში რომ იყოს საჯაროობა და ეს არგუმენტი არ იყოს დახურვის საფუძვლად, ის აპირებს, რომ გადადგას ეს ნაბიჯი”, - განაცხადა ფანცულაიამ.

მისივე თქმით, გარანტია ესეც ვერ იქნება სასამართლოს საჯაროობის, თუმცა ადვოკატები ყველაფერს გააკეთებენ, რომ არგუმენტი არ დარჩეს სასამართლოს დახურვისთვის.

ნინო ექვთიმიშვილი