სამართალი

მამა გიორგი არის უსამართლო პატიმარი, სრულიად უცოდველი კი არავინ ვართ - მეუფე პეტრე

თბილისის საქალაქო სასამართლოში ე.წ. ციანიდის საქმეზე ჭყონდიდელი მიტროპოლიტი მეუფე პეტრე ცაავა დაიკითხა.

როგორც მეუფე პეტრემ სასამართლო დარბაზის დატოვების შემდეგ განაცხადა, ე.წ. ციანიდის საქმეზე ბრალდებული მამა გიორგი არის უსამართლო პატიმარი, სრულიად უცოდველი და უდანაშაულო კი, არავინ ვართ.

„ერთი საინტერესო ადამიანი, რომელსაც საპატიმროში ვნახულობდი და მოვიკითხავდი, ბიზნესმენი, რომელიც რაღაც ცრუ ბრალდებით იყო, ამბობდა, რომ რა თქმა უნდა, მეუფე, არ ვარ მე უდანაშაულო, უცოდველი, როგორც თითოეული ჩვენთაგანი, მაგრამ ვარ უსამართლო პატიმარი. აი, მამა გიორგიც მიმაჩნია, არის უსამართლო პატიმარი და სრულიად უცოდველი და უდანაშაულო არავინ არ ვართ, მათ შორის, არ არის მამა გიორგი. მე ვერ წარმომიდგენია სასულიერო პირი, რომლის გონებაში დაიბადა აზრი ვიღაცის ლიკვიდაციის. ეს არის ყოვლად შეუძლებელი, გამორიცხული, აბსურდი.

ბოლო სიტყვას ამბობს უფალი და ეს სიტყვა იქნება წარმოთქმული სამსჯავროს დროს“, - განუცხადა ჟურნალისტებს მეუფე პეტრემ.