საზოგადოება

მაკა სოლოღაშვილმა თავის განცხადებაში არასწორი და გარკვეულწილად არაკორექტული გამოთქმები დაუშვა - მარინა ეზუგბაია

მაკა სოლოღაშვილის განცხადების ზოგიერთი ფორმულირება აცდენილია სინამდვილეს, – ამის შესახებ თბილისის ინფექციური საავადმყოფოს კლინიკური დირექტორი მარინა ეზუგბაია სოციალურ ქსელში წერს.

„ა.წ. 9 ივნისს ვახტანგ ბოჭორიშვილის სახელობის კლინიკის სამეთვალყურეო საბჭოს თავმჯდომარემ, ქ-ნმა მაკა სოლოღაშვილმა მათი კლინიკის სამი თანამშრომლის „კოვიდ-19“-ით დაინფიცირებასთან დაკავშირებით გააკეთა განცხადება, რომლის ზოგიერთი ფორმულირება აცდენილია სინამდვილეს.

კერძოდ, მან აღნიშნა, რომ „მისი კლინიკა ერთადერთია კოვიდკლინიკებს შორის, რომელსაც არ ჰყოლია არც ერთი დაინფიცირებული მედპერსონალი, არც გამჟღავნებულად, არც დაფარულად“.

სინამდვილეში, ოთხ კოვიდკლინიკას – რუხის კლინიკას, ქუთაისის კლინიკას, მცხეთის კლინიკასა და ინფექციური პათოლოგიისა და შიდსის ცენტრს, დღემდე არ ჰყავთ არც ერთი დაინფიცირებული მედპერსონალი, „არც გამჟღავნებულად და არც დაფარულად“, რაზეც არაკორექტულად მიანიშნებს ქ-ნი მაკა. არც ის არის სიმართლე, რომ ვახტანგ ბოჭორიშვილის სახელობის კლინიკა პირველივე დღიდანაა ჩართული „კოვიდ-19“-თან ბრძოლაში. სინამდვილეში, პირველი „კოვიდ-19“-ით პაციენტი აღნიშნულ კლინიკაში მოთავსდა ა.წ. 19 მარტს, მაშინ, როდესაც საქართველოში პირველი „კოვიდ-19“-ით პაციენტი დაფიქსირდა ა.წ. 26 თებერვალს.

ქ-ნი მაკა თავის განცხადებაში ასევე აღნიშნავს, რომ მისი პერსონალი მარტო დარჩა და არავინ დახმარებია არაადეკვატური ქცევის მქონე პაციენტთან ურთიერთობაში. სინამდვილეში კი, „კოვიდ-19“-ით პაციენტი, რომელზეც ის საუბრობს, მართლაც შეეცადა კლინიკის თვითნებურად დატოვებას, იდგა ინფექციურის ეზოში და უარს აცხადებდა უკან დაბრუნებაზე და არავის იკარებდა. ვერც ქ-ნ მაკას კლინიკის თანამშრომლებმა და ვერც მათ მიერ გამოძახებულმა პატრულის ეკიპაჟმა, რეალურად არსებული რისკის გამო, ვერ მოახერხეს პაციენტთან მიახლოება და მისი დაყოლიება კლინიკაში დაბრუნებაზე და მხოლოდ ინფექციური პათოლოგიისა და შიდსის ცენტრის დაცვის თანამშრომელმა – ბ-ნმა ლევან გაფრინდაშვილმა გაუწია მათ დახმარება საკუთარი ჯანმრთელობის რისკის ფასად. სწორედ ბ-ნმა ლევანმა მოახერხა შესულიყო კომუნიკაციაში აღნიშნულ პაციენტთან და გადასცა იგი ვახტანგ ბოჭორიშვილის სახელობის კლინიკის თანამშრომლებს. ასე რომ, ქ-ნ მაკას ამ მხრივაც სასაყვედურო არავისზე აქვს.

გასაგები მიზეზების გამო, მედპერსონალს და განსაკუთრებით „კოვიდ-19“-ით ავადმყოფებთან მომუშავე მედპერსონალს მთელ მსოფლიოში დაინფიცირების მაღალი რისკის ქვეშ უხდება ყოფნა. ასე მაგალითად, ისეთ განვითარებულ ქვეყნებში, როგორიც იტალია და გერმანიაა – თითოეულს 10 000-ზე მეტი დაინფიცირებული მედპერსონალი ჰყავთ, მაშინ, როდესაც საქართველოში სულ 104 დაინფიცირებული მედპერსონალია, რაც მნიშვნელოვნად ნაკლებია (12,6 პროცენტი), ვიდრე საშუალოდ ევროპაში (დაახლოებით 20 პროცენტი).

ვახტანგ ბოჭორიშვილის სახელობის კლინიკა ერთ-ერთი წამყვანი კლინიკაა ქვეყანაში „კოვიდ-19“-თან ბრძოლაში და იმაში, რომ მისი რამოდენიმე თანამშრომელი „კოვიდ-19“-ით დაინფიცირდა, არაფერი განსაკუთრებული და დასაძრახი არ არის. ასეთი რამ მსოფლიოს ყველაზე უფრო მაღალი დონის კლინიკებშიც ხდება და შეიძლება ყველგან მოხდეს. სამწუხარო მხოლოდ ის არის, რომ ქ-ნმა მაკამ თავის განცხადებაში არასწორი და გარკვეულწილად არაკორექტული (რას ნიშნავს „დაფარულად“?) გამოთქმები დაუშვა“, – წერს მარინა ეზუგბაია „ფეისბუქზე“.