პოლიტიკა

მაინტერესებს, გამოუცხადებს თუ არა ბატონი სარალიძე უნდობლობას ოთარ კახიძეს, რომელმაც თქვა, რომ სარალიძეს პოლიტიკური მოთხოვნები უკარნახეს - ეკა ბესელია

იურიდიულ საკითხთა საპარლამენტო კომიტეტის თავმჯდომარემ და ხორავას ქუჩაზე მოზარდების მკვლელობის საქმეზე შექმნილი დროებითი საგამოძიებო კომისიის წევრმა, ეკა ბესელიამ მოითხოვა განმარტება, უშუალოდ რომელმა განცხადებამ გამოიწვია ზაზა სარალიძის უნდობლობა მის მიმართ.

მან ასევე აღნიშნა, რომ აინტერესებს, გამოუცხადებს თუ არა სარალიძე უნდობლობას კომისიის მდივანს, ოთარ კახიძეს, რომელმაც განაცხადა, რომ მოკლული მოზარდის მამას პოლიტიკური მოთხოვნები უკარნახეს.

„თუ ეს რაიმე სხვა სარჩულის მატარებელი არ არის, ვერ გავიგე, რა იყო ამ განცხადების მიზეზი და მე ვითხოვ, ძალიან კონკრეტულად დასახელდეს სად, რომელი ფრაზა იყო ის, რაც მან ჩათვალა, რომ იყო შეურაცხმყოფელი. მე ვითხოვ , რომ ეს დაკონკრეტდეს. სხვაგვარად აბსურდამდე მივალთ.

მე ძალიან საინტერესოდ მეჩვენება, გუშინ, მაგალითად, ბატონი ოთარ კახიძის განცხადება, რომელმაც პრაქტიკულად თქვა ის, რომ პოლიტიკური მოთხოვნები უკარნახეს ბატონ სარალიძეს და ეს ათქმევინეს. მე მაინტერესებს, მის მიმართ გაცხადდება თუ არა, როგორც კომისიის წევრის მიმართ უნდობლობა. ამაზე მძიმე ბრალდება არავის არ უთქვამს“,- განაცხადა ბესელიამ.