პოლიტიკა

მაიკ პენსის ვიზიტი არის განსაკუთრებით მნიშვნელოვანი გზავნილი ოკუპანტისთვის - გიორგი აბაშიშვილი

საქართველოს პრეზიდენტის ადმინისტრაციის ხელმძღვანელის, გიორგი აბაშიშვილის განცხადებით, აშშ-ის ვიცე-პრეზიდენტის, მაიკ პენსის ჩამოსვლა საქართველოში გზავნილი იქნება ოკუპანტებისთვის.

„ვიცე-პრეზიდენტის ვიზიტი არის განაკუთრებით მნიშვნელოვანი გზავნილი ოკუპანტისთვის, იმ ფონზე, როცა მიმდინარეობს მცოცავი ოკუპაცია. ეს არის მესიჯი, რომ არასოდეს არ შერჩებათ ის ქმედებები და პოლიტიკა, რომელსაც ახორციელებენ სუვერენული ქვეყნების, საქართველოს წინააღმდეგ“, - განაცხადა აბაშიშვილმა.

აბაშიშვილის ინფორმაციით, საქართველოს პრეზიდენტი და აშშ-ის ვიცე-პრეზიდენტი ქართულ-ამერიკული საერთო წვრთნების „ღირსეული პარტნიორი-2017“-ის მონაწილეებს სიტყვით მიმართავენ.

„სწორედ ამ ფონზე, განსაკუთრებით მნიშვნელოვანია, რომ ქვეყნის უმაღლესი მთავარსარდალი გიორგი მარგველაშვილი და ამერიკის შეერთებული შტატების ვიცე-პრეზიდენტი „ღირსეული პარტნიორი - 2017“-ის ფარგლებში, ქართველ და პარტნიორი ქვეყნების შეიარაღებული ძალების წარმომადგენლებს სიტყვით მიმართავენ, სადაც კიდევ ერთხელ ხაზი საქართველოს სუვერენიტეტის და ტერიტორიული მთლიანობის და ქვეყნის თავდაცვისუნარიანობის გაძლიერების მნიშვნელობას გაესმევა, რაშიც ამერიკის შეერთებულ შტატებს განსაკუთრებული წვლილი მიუძღვის. ეს ვიზიტი მთლიანობაში, ჩვენს უმნიშვნელოვანეს სტრატეგიულ პარტნიორთან სტრატეგიულ თანამშრომლობას ხაზს კიდევ ერთხელ უსვამს“, - განაცხადა აბაშიშვილმა.

მაიკ პენსი საქართველოში დღეს საღამოს ჩამოვა.

ანა მებურიშვილი