პოლიტიკა

მაიკ პენსის შეხვედრა ოპოზიციასთან დასრულდა - ოპოზიციონერები პენსის მთავარ გზავნილებზე

აშშ-ის ვიცე-პრეზიდენტის, მაიკ პენსის ოპოზიციასთან შეხვედრა დასრულდა. საქართველოს პარლამენტის ყოფილი თავმჯდომარემ, პარტია „შენების დროა“-ის ხელმძღვანელმა, დავით უსუფაშვილმა მაიკ პენსზე დაყრდნობით განაცხადა, რომ აშშ-ის ეკონომიკური მხარდაჭერა დამოკიდებული იქნება საქართველოს დემოკრატიულ პროცესებზე.

„როდესაც ვსაუბრობდი იმაზე, რომ ჩვენ გვჭირდება ამერიკის მეტი ხელშეწყობა ჩვენი ეკონომიკის განვითარებისთვის, სამუშაო ადგილების ხელშეწყობისთვის, ტექნოლოგიების მიღებისთვის, მსოფლიო ბაზარზე ჩვენი პროდუქციის გატანისთვის და ამ შემთხვევაში, ძალიან დიდ ეკონომიკას, როგორიცაა აშშ, წამყვან ეკონომიკას, მეტის გაკეთება შეუძლია საქართველოსთვის, ბატონი ვიცე-პრეზიდენტის პასუხი იყო, რომ დიახ, ეს ასეა, მაგრამ ბევრი რამეა დამოკიდებული იმ საკითხებზე, რაზეც ჩვენ დემოკრატიის თვალსაზრისით ვსაუბრობდით. იმიტომ, რომ აშშ გაცილებით მეტად და გაცილებით მზადაა ეკონომიკურ თანამშრომლობაზე, მეტ ინვესტიციებზე, როდესაც ისინი ხედავენ უფრო მაღალი სტანდარტის დემოკრატიას. ამ ნაწილში ჩვენ უნდა მოვინდომოთ მეტი, რათა მივიღოთ მეტი“,- განაცხადა უსუფაშვილმა შეხვედრის დასრულების შემდეგ.

„ევროპული საქართველოს“ წევრის, დავით ბაქრაძის განცხადებით, პენსმა მისცა გარანტია, რომ საქართველო აუცილებლად გახდება ნატოს წევრი.

„იყო ძალიან მკაფიო მესიჯი, რომ ამერიკის შეერთებული შტატების ახალი ადმინისტრაცია და პრეზიდენტი ტრამპი აგრძელებს საქართველოს უსაფრთხოების მხარდაჭერის მკაფიო პოლიტიკას, რაც ყველაზე დიდი გარანტიაა იმისა, რომ საქართველო მომავალში აუცილებლად იქნება ერთიანი, აუცილებლად იქნება ნატოს წევრი და ისევე დაცული და წარმატებული ქვეყანა, როგორც დღეს არის ესტონეთი, საიდანაც აშშ-ს ვიცე-პრეზიდენტი ჩამოვიდა და როგორიც არის მონტენეგრო, სადაც საქართველოდან მიდის. მაიკ პენსის ვიზიტის მესიჯები, მარშრუტი ცალსახად ადასტურებას აშშ-ის ძლიერ მხარდაჭერას საქართველოს ტერიტორიული მთლიანობის მიმართ“, - განაცხადა ბაქრაძემ.

აშშ-ის ვიცე-პრეზიდენტი მაიკ პენსი თავისი პირველი ევროპული ტურნეს ფარგლებში ორდღიან ( 31 ივლისი- 1 აგვისტო) ვიზიტს მართავს საქართველოში.

ანა მებურიშვილი