სამართალი

მაჩალიკაშვილის სახლში ჩატარებული ბალისტიკური ექსპერტიზის ფარგლებში აღმოჩენილია ტყვიის შემადგენელი ძირითადი ფრაგმენტები - ადვოკატი

ბალისტიკური ექსპერტიზის ფარგლებში დამატებით ამოიჭრა კედელი, სადაც აღმოჩნდა ტყვიის შემადგენელი ძირითადი ფრაგმენტები, რაც მიმდინარე გამოძიებისთვის მნიშვნელოვანია, - განუცხადა ჟურნალისტებს თემირლან მაჩალიკაშვილის ოჯახის ადვოკატმა მარიამ კუბლაშვილმა გუშინ პანკისში ჩატარებულ ექსპერტიზაზე საუბრისას.

მისი ინფორმაციით, პროკურატურის მასალებში ტყვიის ფრაგმენტების დაახლოებით 30 პროცენტია წარმოდგენილი, რომლის მიხედვითაც ტყვის სრულად აღდგენა წარმოუდგენელი იყო.

„დღევანდელი ექსპერტიზის დროს დამატებით ამოვჭერით კედელი, სადაც აღმოჩენილია ტყვიის ძირითადი ნაწილი, ტყვიის გულის თავი. ვერ ვნახეთ სხვა ფრაგმენტები, რაც ადასტურებს იმას, რომ იყო ერთი გასროლა. დღესვე ჩვენ დავაყენეთ შუამდგომლობა, რომ ტრასოლოგიური ექსპერტიზა ჩაუტარდეს კარებს, თუ როგორ მოხდა შეღწევა. ამ მიზნით ამოვიღეთ საკეტები და გადაიგზავნება ექსპერტიზაზე.

რაც შეეხება ხელყუმბარას, პასუხი ჯერ კიდევ არ არის, რადგან არ არის ექსპერტიზის დასკვნა, იყო თუ არა დნმ-ზე სისხლის კვალი და ანაბეჭდები. ჩვენ გვაქვს ბევრი პასუხგაუცემელი კითხვა. იქიდან გამომდინარე, რომ არ ვიცნობ სპეცრაზმელის ჩვენებას და არ ვიცი რა ვითარებაში აღმოაჩინეს ხელყუმბარა, დამატებითი ინფორმაცია არ მაქვს ამ კუთხით“, - განაცხადა მარიამ კუბლაშვილმა.

ნინო ექვთიმიშვილი