პოლიტიკა

ლორა თორნტონმა ფეისბუქზე დაწერილი პოსტის გამო ბოდიში მოიხადა

ეროვნულ-დემოკრატიული ინსტიტუტის (NDI) საქართველოს ოფისის ხელმძღვანელმა, ლორა თორნტონმა ფეისბუქზე დაწერილი პოსტის გამო ბოდიში მოიხადა.

თორნტონის განმარტებით, მისი მიზანი არ ყოფილა, საქართველო-აშშ-ის ურთიერთობებისთვის ზიანის მიყენება.

„კომენტარი გავაკეთე ჩემს პირად გვერდზე სოციალურ მედიაში, რომელიც შეიძლება ინტერპრეტირებული იყოს, როგორც არასამართლიანი საქართველოსთვის ან საქართველო-აშშ-ის ურთიერთობებისთვის. ბოდიშს ვიხდი ამისთვის, ეს არ ყოფილა ჩემი მიზანი. მე მჯერა მტკიცე ურთიერთობების, რომლებიც დაფუძნებულია საერთო ღირებულებებსა და ინტერესებზე. NDI-ის ოფისი იმ სამუშაოს ერთგულია, რომელსაც საქართველოში ასრულებს“, - დაწერა თორნტონმა.

შეგახსენებთ, NDI-ის ქართული ოფისის ხელმძღვანელი საკუთარ ფეისბუკგვერდზე 23 იანვარს ტელეკომპანია „იმედისთვის“ მიცემულ ინტერვიუს გამოეხმაურა. თორნტონმა ყურადღება გაამახვილა ჟურნალისტის შეკითხვაზე, რომელიც ეხებოდა ეროვნულ-დემოკრატიული ინსტიტუტის 16-18 იანვარს გამოქვეყნებულ კვლევას. წამყვანმა სთხოვა თორნტონს, განემარტა, რა მიზანი ჰქონდა კვლევაში ისეთი კითხვის დასმას, როგორიცაა „რომელი ქვეყანა უფრო ძლიერია სამხედრო თვალსაზრისით - რუსეთი თუ აშშ?“, რაზეც გამოკითხულთა 41%-მა რუსეთი დაასახელა, ხოლო 36%-მა -აშშ. ჟურნალისტი დაინტერესდა, ხომ არ ცდილობდა ორგანიზაცია ამგვარ კითხვებზე მიღებული პასუხებით აშშ-ის პრეზიდენტისთვის მისი საგარეო პოლიტიკის ხარვეზების შეხსენებას.

როგორც თორნტონმა შემდგომ ფეისბუქზე დაწერა, ჟურნალისტის შეკითხვა სასაცილო იყო, რადგან კვლევის შედეგები არ ემსახურებოდა აშშ-ის პრეზიდენტის რუსეთთან დაპირისპირების ლობირებას. NDI-ის ქართული ოფისის ხელმძღვანელის თქმით, დონალდ ტრამპი, სავარაუდოდ, არც ადევნებს თვალს მათი ორგანიზაციის კვლევებს, ხოლო „რუკაზე საქართველოს ვერც იპოვის“.

ამ პოსტის გამო მმართველმა პარტიამ თორნტონისგან ბოდიშის მოხდა მოითხოვა.