პოლიტიკა

„ლიდერთა საბჭო“ საარჩევნო უბნების ხელახლა გადათვლას ითხოვს

არასაპარლამენტო ოპოზიციურ პარტიათა გაერთიანება -„ლიდერთა საბჭომ“ საარჩევნო უბნების ხელახალ გახსნასა და შედეგების გადათვლას ითხოვს.

საბჭოს წევრის, ნინო ბურჯანაძის თქმით, გაყალბება კარგად იყო ორგანიზებული.

„კარგად იყო ორგანიზებული პროცესიო. ორგანიზებული პროცესი საბჭოთა კავშირის დროს რომ იყო არჩევნებისას, იმას ვერ მიედრებით. რაც შეეხება ხმების მოპარვას, ნამდვილად კარგად იყო ორგანიზებული. ჩვენ ყველანი ვითხოვთ უბნების გადათვლას და ის, რომ არცერთ უბანს პრაქტიკულად ხელისუფლება არ ხსნის, ერთადერთი გახსნა და დარღვევა აღმოჩნდა, სხვებს არ ხსნის, ეს ნათლად მეტყველებს იმაზე, რომ ხელისუფლებამ ჩვენ გაგვძარცვა“, -თქვა ბურჯანაძემ.

მან დაამატა, რომ ლიდერთა საბჭო არჩევნების შედეგებს სტრასბურგის სასამართლოში გაასაჩივრებს.
„ერთობლივად გავასაჩივრებთ ცესკოს შემაჯამებელ ოქმს და აუცილებლად გავასაჩივრებთ ამ არჩევნებს სტრასბურგის სასამართლოში“, -აღნიშნა ბურჯანაძემ.

არასაპარლამენტო ოპოზიცია აპირებს თვითმმართველობის არჩევნებთან დაკავშირებით ერთიანი ანგარიშის მომზადებას, რომელსაც შემდგომ საერთაშორისო ორგანიზაციებს გადაუგზავნის.

ანა მებურიშვილი