პოლიტიკა

ლევან ხაბეიშვილის ინფორმაციით, `საბას` თანამშრომლებზე წინასაარჩევნოდ ზეწოლა ხორციელდება

სავაჭრო ცენტრ ,,საბას" ადმინისტრაციის მიერ თანამშრომლების დავალდებულებას, რომ მეორე ტურში ხმა სალომე ზურაბიშვილს მისცენ, ერთიანი ნაციონალური მოძრაობის წევრი, ლევან ხაბეიშვილი ეხმაურება.

ხაბეიშვილი კერძო სექტორის თანამშრომლების მობილიზების მცდელობას "პოლიტიკურ კორუფციად" აფასებს და აცხადებს, რომ აღნიშნულით გამოძიება უნდა დაინტერესდეს:

„საქმე გვაქვს პოლიტიკურ კორუფციასთან. კონკრეტულ ადამიანებს, რომლებსაც ამ შემთხვევაში ბიზნესს უკვე ავალდებულებს ხელისუფლება, შემდეგ უკვე ბიზნესი ავალდებულებს თანამშრომლებს და უზღუდავენ ადამიანებს თავისუფალი არჩევანის შესაძლებლობას.

თავისუფლად რომ სუნთქავს ის ბიზნესი, სამწუხაროდ, საკუთარ თანამშრომლებს არ აძლევს თავისუფლად სუნთქვის საშუალებას და ძალდატანებით ცდილობენ, ქართული ოცნების სასარგებლოდ ხმები შეაგროვონ.

გუშინ, საღამოს, დაიბარეს ყველა თანამშრომელი და მოთხოვეს, რომ ქართულ ოცნებას მისცენ ხმა და მიიტანონ პირადობის მოწმობები და ავალებენ პირდაპირ ქართული ოცნების კანდიდატის, სალომე ზურაბიშვილისთვის ხმის მიცემას. ასევე, თანამშრომლები ყვებიან, რომ არჩევნების დღეს გამოყოფილია სხვადასხვა რაიონის მიმართულებით ე.წ. მიკროავტობუსები იმ ადამიანებისთვის, რომლებიც აუცილებლად შემოხაზავენ სალომე ზურაბიშვილს,“- აცხადებს ხაბეიშვილი.