პოლიტიკა

ლავროვის ვიზიტი აფხაზეთში გამოხატავს რუსეთის პოზიციას, რომ საქართველოსთან ურთიერთობა დალაგებულია და ის ხმას არ ამოიღებს - თორნიკე შარაშენიძე

ექსპერტი თორნიკე შარაშენიძე ოკუპირებულ აფხაზეთში რუსეთის საგარეო საქმეთა მინისტრის, სერგეი ლავროვის დღეს დაგეგმილ ვიზიტს გამოეხმაურა.

შარაშენიძის შეფასებით, რუსეთის ქმედება არის რეაქცია საქართველოს მისწრაფებაზე, დაალაგოს მასთან ურთიერთობა.

„ეს ვიზიტი არის ერთი რამის ნიშანი - მათ მიაჩნიათ, რომ საქართველოსთან ურთიერთობა დალაგებულია, საქართველოს ხმას არ ამოიღებს და მეტი მოფერება და რევერანსი საჭირო არ არის. ამას მეტყველებს ოკუპირებულ აფხაზეთში ვიზიტიც. ასე ლაგდება ურთიერთობები მათთვის“, - განუცხადა შარაშენიძემ „ნიუპოსტს“.

შარაშენიძის თქმით, მმართველი გუნდის ტაქტიკა რუსეთის მიმართებით გულისხმობს, რომ არ გააღიზიანოს მეზობელი ქვეყანა. ექსპერტის ვარაუდით, ამის გამო ხელისუფლება რამე ქმედით ნაბიჯებს არ გადადგამს რუსეთის წინააღმდეგ.

შარაშენიძის თქმით, აფხაზეთში საელჩოს გახსნის გამო რუსეთს სანქციები არ დაეკისრება, ამიტომ საქართველომ უნდა იმუშაოს თავისი გავლენის გაძლიერებაზე, მაგალითად, ჩრდილოეთ კავკასიაში.

„ბუნებრივია, ჩვენ იმის საშუალება არ გვაქვს, რომ რუსეთს სიმეტრიულად ვუპასუხოთ, ე.ი. ჩვენ, რაღაცნაირად ასიმეტრიულად უნდა ვუპასუხოთ - გავააქტიუროთ სახალხო დიპლომატია ჩრდილოეთ კავკასიაში. ჯერ ერთი, ეს ხალხი ჩვენი მეზობელია და სამწუხაროდ, ყოფილა შემთხვევები, როცა რუსეთს გამოუყენებია ისინი ჩვენ წინააღმდეგ, ჩვენზე პირდაპირი შეტევისთვის, შეიძლება პირდაპირ ითქვას, რომ მოუსევია ომის დროს. ასე, რომ ამ მხრივ უნდა ვიმუშავოთ. სხვა ჩვენ რა შეგვიძლია, პროტესტს აზრი არ აქვს, შეიძლება გააპროტესტონ, მაგრამ ამას აზრი არ ექნება. ფაქტია, ამის გამო რუსეთს სანქციებს არავინ დაადებს. სანქციები უკვე დაადეს და ამ ვიზიტს სანქციები არ მოჰყვება“,- განაცხადა შარაშენიძემ.

ანა მებურიშვილი