პოლიტიკა

ლავროვის ბოლო განცხადებამ დამარწმუნა, რომ სწორი გზით მივდივართ- ვიქტორ დოლიძე

ევროინტეგრაციის მინისტრი ვიქტორ დოლიძე რუსეთის საგარეო საქმეთა მინისტრის, სერგეი ლავროვის გუშინდელ განცხადებას გამოეხმაურა. ლავროვმა ოკუპირებული ცხინვალის დე-ფაქტო საგარეო საქმეთა მინისტრ დიმიტრი მედოევთან შეხვედრაზე თქვა, რომ „ამიერკავკასიის რეგიონში შენარჩუნებულია არასტაბილური ვითარება, რომელიც ასევე არის პროვოცირებული საქართველოს მცდელობებით, გამყარდეს ნატოში. ამის საშუალებით კი ნატოს სურს, განმტკიცდეს რეგიონში“.

დოლიძის თქმით, ლავროვის განცხადებამ დაადასტურა, რომ საქართველო სწორი მიმართულებით მიდის.

„ლავროვის ბოლო განცხადება კიდევ ერთხელ მარწმუნებს ჩვენი კურსის, ჩვენი ქმედებების თანმიმდევრულობაში, სისწორეში. ჩვენ სწორ გზას ვადგავართ. თუმცა, ძალიან ცუდია და ძალიან გულდასაწყეტია ის, რომ მიუხედავად ჩვენი კონსტრუქციული, სწორი, თანმიმდევრული და ინტეგრაციის პარალელურად, რუსეთთან ურთიერთობების ნორმალიზებისკენ გადადგმული ნაბიჯების მიუხედავად, ლავროვი მაინც ამ სიტყვვებით გველაპარაკება და ასეთ განცხადებებს აკეთებს. სამწუხაროდ, საქართველოშიც ძალიან ბევრი არასახელმწიფოებრივად მოაზროვნე ოპოზიციონერის მხრიდანაც მომისმენია ასეთი განცხადებები“, - განუცხადა დოლიძემ ჟურნალისტებს, აღმოსავლეთ პარტნიორობის საკითხებზე მომუშავე ელჩებთან შეხვედრის შემდეგ.

ანა მებურიშვილი