პოლიტიკა

ლაშა თორდია პარლამენტის წინაშე 2016 წლის ანგარიშით წარსდგება

პარლამენტში დღეს სახელმწიფო აუდიტის სამსახურის თავმჯდომარე, 2016 წლის ანგარიშს წარადგენს.

როგორც „ევროპული საქართველოს“ წევრმა ირაკლი აბესაძემ განაცხადა, ოპოზიციას კითხვები დაუსაბუთებელ პრემიებთან, დანამატებთან დაკავშირებით ექნებათ.

მისივე თქმით, დაინტერესდებიან, კმაყოფილია თუ არა ლაშა თორდია მის ცემასთან დაკავშირებული გამოძიებით.

„ბევრ მუნიციპალიტეტში თუ სახელმწიფო უწყებაში გამოიკვეთა თუ როგორ იფლანგება თანხები დაუსაბუთებლად პრემიებზე, დანამატებზე. თუ როგორ ხდება შესყიდვების კანონმდებლობის იმგვარად დარღვევა, რომ იფლანგება ასეულობით მილიონი ლარი ბიუჯეტიდან. ამასთან, საინტერესოა ბატონ თორდიას მოსაზრებები ფარცხალაძესთან დაკავშირებით. რამდენად კმაყოფილია ის გამოძიების ძალიან ნელი ტემპით“, - აღნიშნა აბესაძემ.

„ქართული ოცნების“ წევრის, ნუკრი ქანთარიას თქმით კი, საგამოძიებო სტრუქტურები ყველა დანაშაულზე რეაგირებას მაშინვე ახდენენ, ძალიან ბევრი ადამიანი მიეცა პასუხისგებაში.

მისი თქმით, ოპოზიციას ერთადერთი გზა რჩება, რომ ყველაფერი მუქ ფერებში წარმოაჩინოს.

„თუკი რამე ხდება, ის მაშინვე არის ხოლმე გამოძიებული და ძალიან ბევრი მიეცა პასუხისგებაში. აქ ერთადერთი გზა რჩებათ, ყველაფრის გამუქება, გადამეტება და ამ ფონზე როგორღაც წარმოჩენა. ეს არის მათი ერთადერთი ამოცანა, იმიტიმ რომ იციან, რომ თვითმმართევლობის არჩევნებში ვერ გაიმარჯვებვენ“,-აღნიშნა ქანთარიამ.

მონიკა დავლიანიძე