პოლიტიკა

ლარის სტაბილურობის განმსაზღვრელი არის ეკონომიკა, ეკონომიკურ განვითარებაზე პასუხისმგებელია მთავრობა - გიორგი მარგველაშვილი

ეროვნული ბანკი ვერც აქამდე და ვერც მომავალში ვერ უზრუნველყოფს ლარის სტაბილურობას, - ამის შესახებ საქართველოს პრეზიდენტმა გიორგი მარგველაშვილმა გადაცემა ,,არჩევანში“, ლარის გაუფასურებაზე საუბრისას განაცხადა და აღნიშნა, რომ ლარის სტაბილურობის განმსაზღვრელი ეკონომიკაა, ეკონომიკის განვითარებაზე პასუხისმგებელი კი მთავრობაა.

„ჩვენ გვაქვს კომუნიკაცია ეროვნულ ბანკთან, მაგრამ ეროვნული ბანკი მისდევს იმ ძირითად ტენდენციას, რომელიც გულისხმობს მცოცავი კურსის დაბალანსებას. ეროვნული ბანკი ვერც აქამდე და ვერც მომავალში ვერ უზრუნველყოფს ლარის სტაბილურობას. ეროვნული ბანკი ამას მხოლოდ ხელს უწყობს.

ლარის სტაბილურობის განმსაზღვრელი არის ეკონომიკა და არა ეროვნული ბანკი. აქედან გამომდინარე, ბუნებრივია, მე არც გიორგი ქადაგიძის მოღვაწეობაში ვხედავდი დანაშაულის ნიშნებს და ახლაც მგონია, რომ ეროვნული ბანკის კარგი წევრი წარვადგინეთ პარლამენტში, რომელიც შემდეგ არჩეულ იქნა თავმჯდომარედ”, - განაცხადა მარგველაშვილმა და აღნიშნა, რომ საჭიროა ეკონომიკის უფრო დრამატული ზრდა.

,,როდესაც პრემიერ-მინისტრმა თავისი ინიციატივები ოთხპუნქტიანი გეგმის სახით გააცნო საზოგადოებას, მას მხარი დავუჭირე, თუმცა, ვნახოთ, ეს რამდენად არის საკმარისი ეკონომიკური სექტორის გასაძლიერებლად.

ქვეყნის ეკონომიკურ განვითარებაზე პასუხისმგებელი არის მმართველი კოალიცია და მთავრობა. განსაკუთრებით ის მთავრობა, რომელსაც აქვს ამბიცია, რომ ჰყავს ძლიერი ეკონომიკური გუნდი.

აქედან გამომდინარე, ჩვენ უახლოეს მომავალში უნდა ვნახოთ რეალური ინიციატივები, რეალური ნაბიჯები იმისკენ, რომ ეკონომიკური ვითარება, რომელიც არის მძიმე, გაუმჯობესდეს. ეს არის ის, რასაც რეალურად ითხოვს ხალხი. ასე რომ, საკონსტიტუციო ინიციატივებსა და პრეზიდენტის არჩევის წესზე მეტად მნიშვნელოვანი ხალხისთვის იქნება სწორედ ეს ინიციატივები“, - აღნიშნა გიორგი მარგველაშვილმა.

მარი ნამგალაძე