პოლიტიკა

ლადო ჭანტურიას სტრასბურგში მოსამართლეობისთვის შესაფერის კანდიდატად მიიჩნიეს - თეა წულუკიანი

იუსტიციის მინისტრის, თეა წულუკიანის განცხადებით, საქართველოს მთავრობამ ექსპერტ-მრჩეველთა დასკვნის საფუძველზე ლადო ჭანტურია სტრასბურგის ადამიანის უფლებათა სასამართლოს მოსამართლეობის შესაფერის კანდიდატად მიიჩნია.

„ლადო ჭანტურიას სტრასბურგში მოსამართლეობისთვის შესაფერის კანდიდატად მიიჩნიეს და საქართველოს მთავრობამ მივიღეთ შესაბამისი ექსპერტ-მრჩეველთა დასკვნა - ლადო ჭანტურია კონკურსს აგრძელებს. მასთან გასაუბრება და შემდგომი ეტაპებ, სავარაუდოდ, შემოდგომაზე განახლდება. მინდა მივულოცო ლადო ჭანტურიას ეს პირველი ეტაპის წარმატება“, - განაცხადა წულუკიანმა დღევანდელ ბრიფინგზე.

ჭანტურიას გარდა სტრასბურგის მოსამართლეობის კანდიდატებად იყვნენ წარდგენილი სოფიო ჯაფარიძე და შოთა გეწაძე. თეა წულუკიანის თქმით, ისინი მოკლე სასამართლო გამოცდილების გამო არ გადავიდნენ შემდეგ ეტაპზე.

„ამავე ექსპერტ-მრჩეველთა დასკვნით, კომპეტენციის კარგი მაჩვენებლები აქვთ დანარჩენ ორ კანდიდატს სოფიო ჯაფარიძეს და შოთა გეწაძეს. იმ ახალი წესებისა და მკაცრი მოთხოვნების გათვალისწინებით, რომელიც სტრასბურგის ორგანოებმა მოსამართლეობის კანდიდატებს 2009 წლიდან დაუწესეს, ექსპერტებმა მიიჩნიეს, რომ ეს ორი კანდიდატი არის ახალგაზრდა და აქვთ ხანმოკლე სამოსამართლო გამოცდილება აქვს.

თქვენ იცით, რომ შოთა გეწაძე 35 წლის არის. ამის შესახებ პირდაპირ არის მითითებული, რომ დაახლოებით 7-წლიანი სამოსამართლო კარიერა, რაც მას აქვს, არის ხანმოკლე. სოფიო ჯაფარიძის შემთხვევაში, ნათქვამია, რომ მას აქვს, როგორც ექსპერტები ამბობენ, ღირებული გამოცდილება, კარგი ცოდნა ადამიანის უფლებებში სამართალში, მაგრამ ამ შემთხვევაშიც მიიჩნიეს, რომ არის 36 წლის და მისი პროფესიული გამოცდილების მასშტაბი, ხანგრძლივობა არის ხანმოკლე“, - განაცხადა წულუკიანმა.

იუსტიციის მინისტრის თქმით, დანარჩენ ორ კანდიდატთან დაკავშირებით ახალი კონკურსი გამოცხადდება. ქვეყნის შიგნით გამოცხადებული კონკურსის ფარგლებში საბუთების შეტანის ბოლო ვადაა 25 აგვისტო.

ანა მებურიშვილი