პოლიტიკა

ყველაზე სწორი გამოსავალი პოლიტიკური კრიზისიდან იქნებოდა პროპორციული სისტემით ვადამდელი საპარლამენტო არჩევნების ჩატარება - დავით უსუფაშვილი

„შენების მოძრაობის“ ლიდერის, დავით უსუფაშვილის განცხადებითმ ის მხარს უჭერს გაერთიანებული ოპოზიციის მოთხოვნას ვადამდელი საპარლამენტო არჩევნების ჩატარებასთან დაკავშირებით. მისივე თქმით, თუ ეს მოთხოვნა არ დაკმაყოფილდება, მისი პარტია 2020 წლის საპარლამენტო არჩევნებისთვის მოემზადება.

„რაც შეეხება მომავალ საპარლამენტო არჩევნებს, მე არაერთხელ მივმართე ქვეყნის ხელისუფლებასაც და საპრეზიდენტო კანდიდატებსაც მეორე ტურის წინ, რომ მათ ეხელმძღვანელათ სახელმწიფო ინტერესებით და ეზრუნათ შეთანხმებისთვის ერთ წელიწადში პროპორციული სისტემით საპარლამენტო არჩევნების ჩასატარებლად. ეს იქნებოდა ყველაზე სწორი გამოსავალი პოლიტიკური კრიზისიდან და ქვეყანას სწორ გზაზე დააყენებდა, მაგრამ ამგვარი საკითხები შეთანხმებებით მიიღწევა.

სამწუხაროდ, ამისთვის არცერთმა მხარემ არ გადადგა ნაბიჯი არჩევნებამდე, ხოლო არჩევნების შემდეგ ამ საკითხში პროგრესის მიღწევა კიდევ უფრო გართულდა. ეს კი კიდევ უფრო გაართულა ყოფილი პრეზიდენტის პოსტსაარჩევნო ტაქტიკურმა ნაბიჯებმა, ამიტომ ჩვენი მხრიდან პროპორციული საპარლამენტო არჩევნების მოთხოვნა, ამ არჩევნებისადმი მხარდაჭერა რჩება ძალაში, მაგრამ ჩვენ ვემზადებით 2020 წლის საპარლამენტო არჩევნებისთვის. ანუ ვითხოვთ უკეთესს, მაგრამ მზად ვიქნებით უარესისთვის. ჩვენი საქმიანობა მიმართული იქნება იქითკენ, რომ რაც შეიძლება მალე გამოვკვეთოთ ის გუნდი, რომელიც საპარლამენტო საარჩევნო პროცესში გადაიყვანს პოლიტიკურ პარტიას. ძალიან კარგი იქნება თუ მივაღწევთ ვადამდელ არჩევნებს, მაგრამ თუ ვერ მივაღწევთ უნდა ვიყოთ მზად 2020 წელს წარმატებისთვის“, - განაცხადა უსუფაშვილმა დღევანდელ ბრიფინგზე.