პოლიტიკა

ყველას მოვუწოდებ, ყველამ ექიმების აზრს მოვუსმინოთ - თეა წულუკიანი ვანო მერაბიშვილის ჯანმრთელობის მდგომარეობაზე

იუსტიციის მინისტრმა თეა წულუკიანმა საქართველოს ყოფილი პრემიერ-მინისტრისა და შინაგან საქმეთა ყოფილი მინისტრის, მსჯავრდებულის, ვანო მერაბიშვილის ჯანმრთელობის მდგომარეობაზე საუბრისას განაცხადა, რომ არ სურს სამედიცინო თემებზე მას უფრო სერიოზულად უსმენდნენ, ვიდრე მერაბიშვილის მკურნალ ექიმებს.

წულუკიანის ინფორმაციით, მათ ექიმებს სთხოვეს, მერაბიშვილის სისხლის ნიმუშები გააგზავნონ საზღვარგარეთ მოწამვლის გამოსარიცხად.

„ყველას მოვუწოდებ, გუშინ, როდესაც შედგა „მედიქლაბში“ მაღალკვალიფიციური პროფესიონალი ექიმების კონსილიუმი, მათ აზრს მოვუსმინოთ ყველამ. მათი აზრი არის შემდეგი, რომ იმის საპირისპიროდ, რასაც აცხადებენ ადვოკატები, სახეზე არ არის დამბლური პროცესები და დამბლა, რომ სიმსივნური პროცესები გამორიცხულია. ასევე, ექიმების აზრით, გამორიცხულია ინტოქსიკაცია ან მოწამვლა. მაგრამ ჩვენ მაინც მათ ვთხოვეთ, რომ საზღვარგარეთ გადაგზავნილიყო სისხლის ნიმუშები, რათა ასევე გამოირიცხოს მოწამვლის თეორია, რომელიც ადვოკატებს აქვთ. შესაბამისად, მინდა უპირველეს ყოვლისა, მშობლებს, ოჯახს მივულოცო, რომ მსჯავრდებული არის იმ სიმპტომების ნაწილში, რაც მას აწუხებს. ეს არის სუნთქვითი პრობლემა, ქუთუთოს ანთება და სხვა“, – აღნიშნა წულუკიანმა.

მისივე თქმით, ვანო მერაბიშვილის მდგომარეობა უმჯობესდება და ის გამოჯანმრთელების გზაზეა.

„მე მას მხოლოდ ჯანმრთელობას ვუსურვებ და რა თქმა უნდა, ჩვენი პრინციპი დარჩება იგივე – პატიმარს როგორც კი გაუჩნდება რაიმე პრობლემა, რა თქმა უნდა, ყველაფერს გავაკეთებთ, რათა სასჯელაღსრულების საავადმყოფოში ან სამოქალაქო კლინიკაში გადავიყვანოთ იმდენჯერ, რამდენჯერაც ეს დასჭირდება“, – განაცხადა მინისტრმა.

რაც შეეხება ვანო მერაბიშვილის შეწყალების საკითხს, თეა წულუკიანის თქმით, ეს საქართველოს პრეზიდენტის გადასაწყვეტია.

გუშინ ვანო მერაბიშვილის მკურნალმა ექიმმა ელენე ხურციძემ თქვა, რომ მისი მდგომარეობა სტაბილურია და შეშფოთების საფუძველი არ არსებობს. ექიმის თქმით, სიმსივნე გამოირიცხა და ამ დროისთვის ჰორნერის სინდრომის დიაგნოზზე მუშაობენ. ექიმის ინფორმაციით, ყოფილი პრემიერის ჯანმრთელობის მდგომარეობასთან დაკავშირებით „მედიქლაბში" ექიმების კონსილიუმი შეიკრიბა.

დღეს ვანო მერაბიშვილმა კლინიკა „მედიქლაბი“ დატოვა. ის ე.წ. მატროსოვის ციხეში გადაიყვანეს.