პოლიტიკა

ყველას მინდა მოვუწოდო, საქართველოს სცენ პატივი, მომავალ თაობებს და ზეგინდელი დღე მშვიდ პირობებში ჩავატაროთ - თეა წულუკიანი

საქართველოს იუსტიციის მინისტრი, უწყებათაშორისი კომისიის თავმჯდომარე თეა წულუკიანი ყველა პარტიას, დამკვირვებელს უბანზე, საარჩევნო კომისიის თითოეულ წევრს მოუწოდებს, არჩევნების მეორე ტურის დროს პატივი სცენ ქვეყანას, მომავალ თაობებს და სამაგალითო არჩევნები ჩაატარონ.

ამის შესახებ წულუკიანმა ჟურნალისტებს უწყებათაშორისი კომისიის მორიგი სხდომის დასრულების შემდეგ განუცხადა.

მისი თქმით, კომისიამ იმ სისხლის სამართლის საქმეებზე იმსჯელა, რომლებიც 8 ოქტომბრის არჩევნების შედეგად აღიძრა.

„ჩვენ ვიმსჯელებთ, პირველ რიგში, იმ სისხლის სამართლის საქმებზე, რომლებზეც ან გამოძიება მიმდინარეობს, ან გამოძიება უკვე დასრულდა და სასამართლოს განხილვებია. მთლიანობაში, 19 პირია სისხლის სამართლის პასუხისგებაში მიცემული სხვადასხვა ტიპის სისხლის სამართლის კოდექსის დარღვევებისთვის. ზოგიერთ მათგანს გირაო აქვს შეფარდებული, ზოგიერთს საპატიმრო, წინასწარი აღკვეთის ღონისძიება. დანარჩენ საქმეებზე ჯერ კიდევ მიმდინარეობს გამოძიება“,-აღნიშნა მინისტრმა.

მისი თქმით, ამ საქმეების გამოძიება ძალიან მნიშვნელოვანია.

„სამართალდამცველი ორგანოები მუშაობენ აქტიურად, რადგან ყველამ ვიცით და მათაც იციან, რომ სისხლის სამართლის სფეროში, როდესაც სახეზეა დანაშაულის ნიშნები, დევნას აქვს ძალიან მნიშვნელოვანი გადამარწმუნებელი ეფექტი, რომ მომავალში არ მოხდეს იგივე, რომ სხვამ არ ჩაიდინოს იგივე“,-განაცხადა თეა წულუკიანმა.

მან არჩევნების მეორე ტურში ყველა ჩართულ პირს იქნება ეს პარტიები, თუ საარჩევნო ადმინისტრაცია, თუ დამკვირვებლები, პატივი სცენ ქვეყანას და სამაგალითო არჩევნები ჩაატარონ.

„ყველას მინდა მოვუწოდო, ყველა პარტიას, ყველა წარმომადგენელს უბანზე, ყველა კომისიის თითოეულ წევრს, დამკვირვებლებს, რომ საქართველოს სცენ პატივი, ჩვენი ქვეყნის მომავალს სცენ პატივი, მომავალ თაობებს და ზეგინდელი დღე ყველამ ჩავატაროთ ცივილურ, სამაგალითოდ მშვიდ პირობებში“,- აღნიშნა წულუკიანმა.

მონიკა დავლიანიძე