პოლიტიკა

ყველამ უნდა იცოდეს, რას ნიშნავს, როცა ვამბობთ, რომ არჩევნები იყო ტოტალურად გაყალბებული - გიორგი ახვლედიანი

გაერთიანებული ოპოზიცია დარწმუნებულია, რომ საპარლამენტო უმრავლესობა არჩევნების გაყალბების თემაზე სპეციალური დროებითი საგამოძიებო კომისიის შექმნას არ დაუშვებს.

აღნიშნულთან დაკავშირებით განცხადება დღევანდელ პრესკონფერენციაზე „დემოკრატიული მოძრაობის“ ერთ-ერთმა ლიდერმა, გიორგი ახვლედიანმა გააკეთა. მისი თქმით, არსებობს საკითხების ჩამონათვალი, რომელსაც საგამოძიებო კომისიამ პასუხი უნდა გასცეს.

„განცხადება, რომელიც 9 პოლიტიკურმა სუბიექტმა გავაკეთეთ, უკავშირდება 8 ოქტომბრის საპარლამენტო არჩევნების შედეგებს. მისი მიზანია, რეალური ინფორმაცია მივაწოდოთ ყველა დაინტერესებულ პირს, როგორც ქვეყნის შიგნით, ისე გარეთ. ყველამ უნდა იცოდეს, რას ნიშნავს, როცა ვამბობთ, რომ არჩევნები იყო ტოტალურად გაყალბებული. მაგალითად, არჩევნებამდე არ შეცვალეს საარჩევნო სისტემა; არჩევნების დღეს ხდებოდა „კარუსელებით“ მანიპულირება; როგორ არ იყენებდნენ მარკირებას; როგორ ითვლიდნენ ხმებს და იპარავდნენ ბიულეტენებს; როგორ აბათილებდნენ ბიულეტენებს; შემდგომ კი ზემოქმედება სასამართლოზე, რომ არ მომხდარიყო 1 უბნის შედეგების გახსნა და ხელახლა გადათვლა,“ - განცხადა გიორგი ახვლედიანმა.

მისი თქმით, ეს ის საკითხებია, რომლის გამოძიებასაც 9 პოლიტიკური სუბიექტისგან შემდგარი ჯგუფი ითხოვს. პარლამენტში ამ საკითხის გააქტიურებას „პატრიოტთა ალიანსი“ გეგმავს.

„ეჭვი მაქვს, რომ საპარლამენტო უმრავლესობა საგამოძიებო კომისიის შექმნას დაუშვებს. უბნები რომ გაეხსნათ, შედეგები რეალურად შეიცვლებოდა. რაც შეეხება სტრასბურგს, ჩვენ – „დემოკრატიულმა მოძრაობამ“- სასამართლოს ყველა ინსტანცია გავიარეთ, დარჩა მხოლოდ ერთადერთი – სტრასბურგი და ამასაც გავაკეთებთ, რომ არჩევნებისთვის გაყალბებულის სტატუსის მინიჭება საერთაშორისო დონეზე მოხდეს“, – აღნიშნა გიორგი ახვლედიანმა.

ნინო ექვთიმიშვილი