პოლიტიკა

ყველამ უნდა დაიცვას გუნდურობა და მთავარი წესი, რომ შიდა საკითხები გარეთ არ გამოვიდეს - დიმიტრი ხუნდაძე

საპარლამენტო უმრავლესობის წევრის, დიმიტრი ხუნდაძის აზრით, ფრაქცია „ქართული ოცნების“ შეხვედრის დაგეგმვა აუცილებელი იყო, რადგან წლის დასაწყისია და ფრაქციამაც უნდა დაგეგმოს, როგორ იმუშაოს წლის განმავლობაში.

მას არ დაუკონკრეტებია, იქნება თუ არა მსჯელობა დღეს პარტიიდან ეკა ბესელიას გარიცხვის შესახებ, თუმცა დეპუტატმა აღნიშნა, რომ ფრაქციის წევრები პრობლემურ საკითხებზე აუცილებლად იმსჯელებენ.

„იქნება პრობლემური საკითხების განხილვაც. ვფიქრობ, მთავარი არის ის, რომ ყველამ უნდა დაიცვას გუნდურობა და მთავარი წესი, რომ შიდა საკითხები გარეთ არ გამოვიდეს“, – განაცხადა ხუნდაძემ.

თუმცა კითხვაზე, ვინ დაარღვია გუნდურობის ეს პრინციპები, დეპუტატმა პერსონიფიცირებისგან თავი შეიკავა და აღნიშნა, რომ გუნდურობის პრინციპები გუნდში ყველა წევრს ეხება.

„პერსონიფიცირებისგან თავს შევიკავებ. კონკრეტული დეტალები ფრაქციაზე იქნება განხილული. გუნდის მთავარი წესი - გუნდურობა ეხება გუნდის თითოეულ წევრს. ამიტომ გუნდის თითოეული წევრის პასუხისმგებლობა უნდა იყოს, რომ გუნდის მთავარი წესი იყოს დაცული“,- განაცხადა ხუნდაძემ.

ამ წუთებში ფრაქცია "ქართული ოცნების“ ოფისში სხდომა მიმდინარეობს, რომელსაც მმართველი გუნდის თავმჯდომარე ბიძინა ივანიშვილი ესწრება.