პოლიტიკა

ყველაფერს გავაკეთებ, რომ ეს ძალები იყვნენ ერთიანი - მერაბიშვილი ენმ-სა და ,,ევროპულ საქართველოზე“

ამ ორმა ძალამ რაღაც ეტაპზე მაინც უნდა ნახოს საერთო ენა და საერთო ინტერესებისთვის იბრძოლოს, - განაცხადა საქართველოს ყოფილმა პრემიერმა, ვანო მერაბიშვილმა კითხვაზე პასუხად, თუ ,,ნაციონალური მოძრაობის” დაშლის შემდეგ ვის უჭერს მხარს, ენმ-ს დარჩენილ ნაწილს თუ გამოყოფილ ,,ევროპულ საქართველოს.“

მერაბიშვილი უკვე მეექვსე წელია ციხეშია და ამ დრომდე ამ საკითხზე მისი პოზიცია უცნობი იყო.

როგორც მერაბიშვილმა რუსთავი 2-თან ინტერვიუში განაცხადა, ამ ორი პარტიის წევრები თავისი თავის თანამებრძოლებად მიაჩნია და ამიტომაც არჩევანზე არ უფიქრია.

"სიმართლე გითხრათ ბოლომდე ვერ გავიაზრე და ვერ გავითავისე ის ფაქტი, ასე ვთქვათ, რომელსაც აქვს ადგილი, რომ პარტია არის გაყოფილი. მე ჯერაც ისევ ვუყურებ, რომ ამ ორმა ძალამ რაღაც ეტაპზე მაინც უნდა ნახოს საერთო ენა და საერთო ინტერესებისთვის იბრძოლოს... მე მინდა და ყველაფერს გავაკეთებ, რომ ეს ძალები იყვნენ ერთიანი... მე მინდა, რომ ჩემი მთელი ენერგია საერთო ძალების გაერთიანებას მოვახმარო, თუ შემდეგ შევხედავ, რომ ეს ვერ ხერხდება, მერე მივიღებ [გადაწყვეტილებას] ობიექტურ ინფორმაციაზე დაყრდნობით", — განაცხადა მერაბიშვილმა.