პოლიტიკა

ყველაფერი შესაძლებელია სამყაროში, თუმცა მეეჭვება, ბიძინა ივანიშვილი პრეზიდენტობას დათანხმდეს - ნუკრი ქანთარია

საპარლამენტო უმრავლესობის წევრი, ნუკრი ქანთარია გამოეხმაურა ინფორმაციას, რომლის თანახმად, „ქართული ოცნების“ საპრეზიდენტო კანდიდატი, სავარაუდოდ, ექს-პრემიერი ბიძინა ივანიშვილი გახდება.

როგორც პარლამენტარმა „პირველ რადიოსთან“ საუბრისას განაცხადა, მსგავსი განხილვები მმართველ გუნდში არ ყოფილა.

„ყველაფერი შესაძლებელია სამყაროში, მაგრამ ჯერჯერობით ამის განხილვები არ ყოფილა. ასე რომ, ვერ გეტყვით ვერაფერს, ნამდვილად განხილვა არ ყოფილა. მე ჩემი აზრი ვთქვი უბრალოდ, რომ კანდიდატი ახალგაზრდა არ უნდა იყოს, დღევანდელი პრეზიდენტი უნდა იყოს ცხოვრებისეული გამოცდილებით.

ასე რომ, თუ ბიძინა ივანიშვილი ამაზე დათანხმდება, რაც მეეჭვება, რა თქმა უნდა, ძალიან კარგი ვარიანტი იქნებოდა, ყველაფერი გასწორდებოდა, მაგრამ არა მგონია, რომ ასე იყოს. ვნახოთ, დაველოდოთ.

რა თქმა უნდა, მე არავის ახლა არ დავასახელებ, თუმცა არიან რამდენიმე, ვფიქრობ რომ აუცილებლად მოიძებნება, იმიტომ, რომ დღეს სხვა ვითარებაა უკვე. თვითონ პრეზიდენტის ინსტიტუტიც არ არის იმ მასშტაბის, რაც ადრე იყო, ამიტომ მგონია, რომ ქვეყნის წინაშე დამსახურებების მქონე ადამიანს, რომელსაც აქვს პიროვნული ხიბლი და წესიერი ადამიანია, ყველას შეუძლია, წარმოჩინდეს კანდიდატად.

არ არის აუცილებელი რომ გუნდისა და პარტიის წევრი იყოს. ვნახოთ, ვისზე იქნება საუბარი. საზოგადოებაშიც შეიძლება მოიძებნოს ასეთი ადამიანები და ურიგო არ იქნებოდა“, -თქვა ქანთარიამ.