პოლიტიკა

ყველაფერი გავაკეთეთ ხუთი წლის განმავლობაში, რომ დაგვებნია ჩვენი ქვეყნის ამომრჩეველი - პრეზიდენტი

საქართველოს პრეზიდენტ გიორგი მარგველაშვილს ისევ არ დაუკონკრეტებია, მიიღებს თუ არა მონაწილეობას წლევანდელ საპრეზიდენტო არჩევნებში.

პრეზიდენტი ასევე გამოეხმაურა ეროვნულ-დემოკრატიული ინსტიტუტის (NDI) მიერ ჩატარებული კვლევას, რომლის თანახმად გამოკითხულთა 74%-ს არ აქვს გადაწყვეტილი, ვის მისცემს ხმას, ხვალ რომ საპრეზიდენტო არჩევნები ჩატარდეს. მარგველაშვილის შეფასებით, ამომრჩეველი დაბნეულია.

„ყველაფერი გავაკეთეთ ხუთი წლის განმავლობაში, რომ დაგვებნია ჩვენი ქვეყნის ამომრჩეველი და დაგვებნია მათი მოლოდინები ქვეყნის მთავარ ინსტიტუტთან დაკავშირებით. დღეს ამომრჩეველმა იცის, რომ პრეზიდენტს ჩამოართვეს უშიშროების საბჭო, ჩამოართვეს მოსამართლეების დანიშვნის უფლება, ჩამოართვეს საერთაშორისო აქტიურობების უფლება, რომ ფაქტობრივად, მოქალაქეობის უფლების ნაწილში იუსტიციის მინისტრის გადასაწყვეტი იქნება ეს საკითხი.

აქედან გამომდინარე, მოქალაქეები დაბნეული არიან, ასევე დაბნეულია პოლიტიკური სპექტრი. ბევრი ხნის განმავლობაში მიმდინარეობდა სისტემურად რყევა არა მარტო პრეზიდენტის ინსტიტუტის, არამედ ისეთ მნიშვნელოვანი ინსტიტუტის, როგორიც არის უშიშროების საბჭო და სხვა.

შესაბამისად, ჩემთვის არ არის გასაოცარი მოქალაქეების ჩამოუყალიბებლობა იმასთან დაკავშირებით, თუ რა მოლოდინები უნდა ჰქონდეთ საპრეზიდენტო ინსტიტუტის მიმართ.

ჩემს გადაწყვეტილებას მოგახსენებთ, როდესაც ამასთან დაკავშირებით ვიქნები ჩამოყალიბებული, მათ შორის, ეს ფაქტორებია, რომელიც, მე ჩამოგითვალეთ.

ძალიან რთულია, ქვეყანაში, სადაც ამდენი გაჭირვებაა, იყო ქვეყნის პირველი პირი და არ შეგეძლოს, დაეხმარო შენს მოქალაქეებს, ვისზეც ყველაზე მეტად შეგტკივათ გული. ამ გადაწყვეტილებას მოგახსენებთ, როდესაც მივიჩნევ საჭიროდ“, – განაცხადა პრეზიდენტმა.