პოლიტიკა

კულახმეტოვი სამხედრო დამნაშავეა - ირაკლი სესიაშვილი რუსეთის ახალ ელჩზე ოკუპირებულ სამხრეთ ოსეთში

პარლამენტის თავდაცვისა და უშიშროების კომიტეტის თავმჯდომარემ ირაკლი სესიაშვილმა ე.წ. სამხრეთ ოსეთში რუსეთის ელჩის თანამდებობაზე მარატ კულახმეტოვის დანიშვნა შეაფასა.

სესიაშვილის განცხადებით, კულახმეტოვი სამხედო დამნაშავეა, რადგან საქართველოს წინააღმდეგ იბრძოდა რუსეთ-საქართველოს ომის დროს.

„ამასთანავე, ეს რეალური სახეა ოკუპანტის - რუსეთის, რომელიც ისეთ პირს ნიშნავს, რომელიც რუსეთ-საქართველოს ომში მონაწილეობას უშუალოდ იღებდა და ჩვენს ქვეყანას ებრძოდა. ის არის პირი, რომელიც ჩემთვის სამხედრო დამნაშავეა და ასეთ პირს ე.წ. ელჩად რომ ნიშნავ, თავისთავად, ოკუპაციასთან და საერთაშორისო სამართლის მიმართ საკუთარ დამოკიდებულებას გამოხატავ, რაც საერთაშორისო თანამეგობრობისთვის ადვილად აღსაქმელი და გასაგებია“, - განაცხადა სესიაშვილმა.

შეგახსენებთ, გუშინ რუსეთის პრეზიდენტმა ვლადიმერ პუტინმა ხელი მოაწერა განკარგულებას, რომლის მიხედვით მან ე.წ. სამხრეთ ოსეთში რუსეთის საგანგებო და სრულუფლებიან ელჩად გენერალ-მაიორი მარატ კულახმეტოვი დანიშნა. კულახმეტოვმ ამ პოსტზე ელბრუს კარგიევი შეცვალა.

ანა მებურიშვილი