პოლიტიკა

კრემლის პროპაგანდისტული არხ „რასიას“ წამყვანის სასტუმროში განთავსებისა და კვების ხარჯები ტურიზმის ეროვნულმა ადმინისტრაციამ დაფარა

რუსეთის სახელმწიფო არხ „რასიას“ ტელეწამყვანი, ანდრეი მალახოვი, გადამღებ ჯგუფთან ერთად, საქართველოში იმყოფებოდა. მათ თბილისი წუხელ დატოვეს.

ტურიზმის ეროვნული ადმინისტრაციის პრესსამსახურის განმარტებით, მალახოვი საქართველოში ჩამოვიდა გადაცემა „შვებულება ანდრეი მოლოხოვთან ერთად“ გადასაღებად, რომელიც საქართველოს შესახებ იქნება მომზადებული.

როგორც რუსთავი 2 იუწყება, რუსი წამყვანი შემოქმედებით ჯგუფთან ერთად, სასტუმრო ბილტმორში იყო დაბინავებული. მისივე ინფორმაციით, მალახოვი შატო მუხრანში იმყოფებოდა, ასევე დაესწრო სპექტაკლს მარჯანიშვილის თეატრში.

უწყებამ დაადასტურა, რომ მალახოვის სასტუმროში განთავსებისა და კვების ხარჯები ტურიზმის ეროვნულმა ადმინისტრაციამ დააფინანსა.

ტურიზმის ეროვნული ადმინისტრაციის ყოფილმა უფროსმა და ჯემ ფესტის დამფუძნებელმა გიორგი სიგუამ, ჩოგოვაძის უწყების გადაწყვეტილება გააკრიტიკა და ჩოგოვაძე კორუფციაში დაადანაშაულა.

„მაშინ, როდესაც რუსეთი ჩვენს საზღვრებს წევს, იტაცებს ჩვენს მიწებს, ჩვენს მოქალაქეებს, მავთულხლართებს გადმოწევას, საოკუპაციო პოლიტიკას აწარმოებს. ამ დროს ქართული ბიუჯეტის თანხები ტურიზმის ეროვნული ადმინისტრაციიდან გადის საეჭვო არხებითა და გზებით რუსეთში. იხარჯება, ვითომდა, სარეკლამო კამპანიების შესასყიდლად მილიონი და ათეულობით მილიონი ლარი, სინამდვილეში ეს ფული მიდის იმ კომპანიებთან, იმ ადამიანებთან, რომლებიც ხელმძღვანელობას, ამ შემთხვევაში გიორგი ჩოგოვაძეს უნაწილებენ ამ თანხას ე.წ. ატკატების სახით. ამის შესახებ კარგად იციან სუს-ის ანტიკორუფციულ სააგენტოში. ერთი თვის განმავლობაში დაატარებენ ამ ბატონს დაკითხვებზე და თაროზე უევთ მისი ნავაჟკაცარი საქმეები. მაშინ კვირიკაშვილი და ქუმსიშვილი მფარველობდნენ მას და არ დაიჭირეს. ახლა რა უშლით ხელს?“, -თქვა სიგუამ.