პოლიტიკა

კრემლის მისამართით გამოთქმული გზავნილი შთამბეჭდავი მესიჯია ყველასთვის, ვინც რუსეთის ზეწოლას განიცდის - ვახტანგ ყოლბაია

აფხაზეთის მთავრობის თავმჯდომარის მოვალეობის შემსრულებლის ვახტანგ ყოლბაიას შეფასებით მაიკლ პენსის ვიზიტი, ძალაიან მნიშვნელოვანი და იმედის მომცემია.

მისივე შეფასებით, მაიკ პენსის მიერ მოსკოვის მისამართით გამოთქმული ხმამაღალი გზავნილი, ყველასთვის შთამბეჭდავი მესიჯია, ვინც რუსეთის მხრიდან ზეწოლას განიცდის.

„განსაკუთრებით დღევანდელ სიტუაციაში, როდესაც ოკუპირებულ ტერიტორიებზე მცოცავი ოკუპაცია გრძელდება, რომელიც მნიშვნელოვნად ზღუდავს მშვიდობიანი ცხოვრებისა და სამშვიდობო მოლაპარაკების არეალს, ევროპული ტურნეს ფარგლებში კრემლის მისამართით გამოთქმული ხმამაღალი გზავნილი შთამბეჭდავი მესიჯია ყველასთვის, ვინც გამუდმებით განიცდის რუსეთის ზეწოლას“,-აღნიშნავს ვახტანგ ყოლბაია.

მისივე თქმით, ყოვლისმომცველი იყო სიტყვები იმის შესახებ, რომ ამერიკა კვლავაც მხარს უჭერს საქართველოს ტერიტორიულ მთლიანობას და ამ მიზნით ახალი გზების მოძიების პროცესს განაგრძობს.

„აფხაზეთის მთავრობისა და მთელი დევნილი საზოგადოებისთვის განსაკუთრებით ამაღელვებელი იყო სიტყვები-„დარწმუნებული ვარ, დადგება დღე, როდესაც თქვენი ქვეყანა საკუთარი ტერიტორიების დაბრუნებას აღნიშნავს“.

გულგრილად შეუძლებელია მოისმინო მაიკ პენსის გულითადი სიტყვები საქართველოს მისამართით: „გარწმუნებთ, რომ აშშ გააგრძელებს საქართველოს სუვერენიტეტის მხარდაჭერას. დონალდ ტრამპის ადმინისტრაციის პირობებში აშშ არცერთ ქვეყანას არ მისცემს უფლებას კითხვის ნიშნის ქვეშ დააყენოს ეს საკითხი. პრეზიდენტი ტრამპი და ჩვენ მოვუწოდებთ რუსეთს, შეწყვიტოს აგრესია. ძალა ერთობაშია. ღმერთმა დალოცოს ამერიკა და საქართველო“. როდესაც ამას მთელი მსოფლიოს გასაგონად, ამერიკის ახალი ადმინისტრაციის ერთ-ერთი ყველაზე გავლენიანი პირი აცხადებს, მერწმუნეთ, ჩვეულებრივად ვერ აღიქვამ. ამას უკვე სხვა მნიშვნელობა ენიჭება, რაც ხვალინდელ იმედს და ჩვენს მომავალს უკავშირდება. ამავე დროს, ეს არის პასუხი კრემლის იმ ქმედებაზე, როდესაც რუსეთის პრეზიდენტი ვლადიმერ პუტინი 8 აგვისტოს ოკუპირებულ აფხაზეთში ჩასვლას გეგმავს“-განაცხადა ვახტანგ ყოლბაიამ.

მონიკა დავლიანიძე