პოლიტიკა

ყოველდღიურად ვხვდებით ჩვენი მოქალაქეების უფლებების ძალიან მძიმე და უხეშ დარღვევას - ზაზა გაბუნია აფხაზეთში საქართველოს მოქალაქის დაკავებაზე

პარლამენტარი ზაზა გაბუნია ოკუპირებულ აფხაზეთში საქართველოს მოქალაქის დაკავების ფაქტს გამოეხმაურა.

დეპუტატის თქმით, ამას მოჰყვება ქართული მხარის მკაცრი რეაგირება.

„უპირველეს ყოვლისა, მინდა, თავად ინციდენტს გამოვეხმაურო. ადამიანის უფლებების ხელყოფისა და ფეხქვეშ გათელვის ასეთი მძიმე ფაქტები აზიანებს იმ სამშვიდობო პოლიტიკას, რომლის შესაძლებლობა უნდა გააჩინოს რუსეთის ფედერაციამ. ჩვენი მხარე, ჩვენი სახელმწიფო აქცენტს აკეთებს სამშვიდობო პოლიტიკის უალტერნატივობაზე. ძალიან სამწუხაროა, რომ ამ ფონზე, ჩვენ პრაქტიკულად ყოველდღიურად ვხვდებით ჩვენი მოქალაქეების უფლებების ძალიან მძიმე და უხეშ დარღვევას.

ბუნებრივია, ამას ექნება ძალიან მკაცრი რეაქცია და გამოხმაურება. ჩვენი მხრიდან ბუნებრივია, დაწყებულია იმ ნაბიჯების გადადგმაც, რაც ასეთ დროს არის ურგენტული, სასიცოცხლოდ მნიშვნელოვანი. ამავდროულად, ამას ექნება შესაბამისი შეფასება ჩვენი საერთაშორისო თანეგობრობის მხრიდანაც“,-თქვა გაბუნიამ.

ოკუპირებულ აფხაზეთში, გალის რაიონში ე.წ. საზღვრის უკანონო გადაკვეთის ბრალდებით ზუგდიდის მკვიდრი გიორგი ზარანდია დააკავეს.

აფხაზეთის დე-ფაქტო უშიშროების საბჭოს ინფორმაციით, „საზღვრის უკანონოდ გადაკვეთის საქმეზე გალის რაიონის პროკურატურამ სისხლის სამართლის საქმე აღძრა. ტარდება საჭირო საგამოძიებო მოქმედებები“.