პოლიტიკა

კონსტიტუციაში ცვლილებების შეტანის ორ ვარიანტს განვიხილავთ - ვახუშტი მენაბდე

კონსტიტუციონალისტი ვახუშტი მენაბდის თქმით, საკონსტიტუციო კომისიაზე განიხილავენ იმ ჩანაწერის გაუქმებას, რომელიც ავალდებულებს გადასახადების მიღების წინ რეფერენდუმის გამართვას.

გარდა ამისა საკონსტიტუციო კომისიაზე ქვეყნის უზენაეს კანონში ცვლილებების შეტანის ორ წესს განიხილავენ. შემოღებული ინიციატივით, კონსტიტუციაში კანონის შესაცვლელად საჭირო იქნება ორი მოწვევის პარლამენტის მხარდაჭერა, სხვა შემთხვევაში კი, ცვლილებებს ისევ ძველი წესით პარლამენტის სამი-მეოთხედი მიიღებს.

„დღეს კონსტიტუციის მიხედვით, გადასახედების შემოღებისთვის საჭიროა, რეფერენდუმის გამართვა. შემოთავაზებული წინადადების მიხედვით, ეს ჩანაწერი უნდა გაუქმდეს. ასევე მნიშვნელოვანი საკითხია კონსტიტუციის გადასინჯვა. ინიცირებული პროექტის მიხედვით, კონსტიტუციის გადასინჯვისთვის ორი წესია შემოთავაზებული. ერთი წესით, ორი-მესამედით მიიღებს გადაწყვეტილებას პარლამენტი, თუმცა საჭირო იქნება საბოლოო პროექტის მისაღებად ახალი პარლამენტის მიერ რატიფიცირება და დადასტურება, ანუ ამ ცვლილებების კონსტიტუციაში შესატანად ორი მოწვევის პარლამენტი იქნება საჭირო. ხოლო მეორე გზაა, რომელიც შემოთავაზებული პროექტითაა დასახული, არის მოქმედი სამი-მეოთხედის სისტემით კონსტიტუციის გადასინჯვა და ამ შემთხვევაში საჭირო აღარ იქნება ახალი პარლამენტის მიერ საკონსტიტუციო ცვლილებების დადასტურება“, - თქვა მენაბდემ სხდომის დაწყების წინ.

ანა მებურიშვილი