პოლიტიკა

კონსტიტუციაში გავაჩინოთ ჩანაწერი, რომ აფხაზეთს და ცხინვალის რეგიონს ექნება განსაკუთრებული სტატუსი - ზაქარია ქუცნაშვილი

საპარლამენტო უმრავლესობის წევრის, ზაქარია ქუცნაშვილის განცხადებით, კონსტიტუციაში უნდა გაჩნდეს ჩანაწერი, რომელიც ოკუპირებულ აფხაზეთსა და ცხინვალის რეგიონს განსაკუთრებულ სტატუსს მიანიჭებს.

როგორც ქუცნაშვილმა პარლამენტში საკონსტიტუციო კომისიის, ადმინსიტრაციულ-ტერიტორიული, მოწყობისა და თვითმმართველობის მოწყობის საკითხზე მომუშავე ჯგუფის პირველი სამუშაო შეხვედრის ფარგლებში მედიას განუცხადა, ჩინეთიც კი იძულებული გახდა ტერიტორიული მთლიანობის მშვიდობიანი გზით აღდგენისთვის წასულიყო იმ გზაზე, რომ ერთი სახელმწიფოს ქვეშ ორ სისტემას ეფუნქციონირა.

„კონსტიტუციაში გავაჩინოთ ჩანაწერი, რომ აფხაზეთს და ცხინვალის რეგიონს ექნება განსაკუთრებული სტატუსი საქართველოს ერთიანი სახელმწიფოს შემადგენლობაში. დიდი ჩინეთიც კი იძულებული გახდა მრავალი წლის შემდეგ, ტერიტორიული მთლიანობის მშვიდობიოანი გზით აღდგენისთვის, წასულიყო იმ გზაზე, რომ ერთი სახელმწიფოს ქვეშ ორ სისტემას ეფუნქციონირა:ჰ ონკონგის სისტემას და ჩინეთის დანარჩენი სახელმწიფოს მოწყობას. ამიტომ, ჩემთვის, როგორც ქართველისთვის, ისეთი მნიშვნელოვანია ქვეყნის ერთიანობა და ქვეყნის მთლიანობის აღდგენა, რომ ვფიქრობთ, ჩვენ უნდა გადავდგათ თამამი ნაბიჯი, გავუგზავნოთ გზავნილი ჩვენს აფხაზს და ოს ძმებს და შევთავაზოთ განსაკუთრეული სტატუსი საქართველოს ერთიანი სახელწმიფოს შემადგენლობაში“,-აღნიშნა ქუცნაშვილმა.

მონიკა დავლიანიძე