პოლიტიკა

კონკრეტული სუბიექტები, მათ შორის პრეზიდენტი და პოლიტიკური პარტიები, ცდილობდნენ პოლიტიკური გავლენის მოხდენას სტრასბურგის სასამართლოზე - კობახიძე გუშინდელ განცხადებას განმარტავს

საქართველოს პარლამენტის თავმჯდომარემ ირაკლი კობახიძემ დააზუსტა, რას გულისხმობდა, როცა სტრასბურგის სასამართლოს გადაწყვეტილებას „რუსთავი 2“-ის საქმესთან დაკავშირებით პოლიტიკური უწოდა.

როგორც კობახიძემ ჟურნალისტებს განუმარტა, კონკრეტული პოლიტიკური სუბიექტები, მათ შორის პრეზიდენტი და ზოგიერთი პოლიტიკური პარტია, ცდილობდნენ წერილების მეშვეობით სტრასბურგის სასამართლოზე გავლენის მოხდენას, რაც აისახა საბოლოო გადაწყვეტილებაზე.

„იყო კონკრეტული ნიშნები იმისა, რომ კონკრეტული სუბიექტები, მათ შორის საქართველოს პრეზიდენტი, კონკრეტული პოლიტიკური პარტიები და სხვა სუბიექტები, ცდილობდნენ პოლიტიკური გავლენის მოხდენას სტრასბურგის სასამართლოს გადაწყვეტილებაზე. შესაბამისი წერილებიც გააგზავნეს სტრასბურგის სასამართლოში და ბუნებრივია, ეს იყო პოლიტიკური გავლენის მოხდენის მცდელობა და ბუნებრივია, ამ გავლენის ქვეშ იქნა მიღებული ეს გადაწყვეტილება. ეს არ ნიშნავს, რომ გადაწყვეტილება იყო პოლიტიკური, თუმცა მიზანი იყო პოლიტიკური გავლენის მოხდენა და ეს პოლიტიკური გავლენა ჩვენ ვიხილეთ",- განაცხადა კობახიძემ.

კითხვაზე, ცდილობდა თუ არა საგარეო საქმეთა მინისტრი სტრასბურგში ვიზიტისას, გავლენა მოეხდინა ევროპული სასამართლოს გადაწყვეტილებაზე, კობახიძემ უარყოფითად უპასუხა.

„საგარეო საქმეთა მინისტრს სტრასბურგის სასამრთლოსთვის წერილი არ მიუწერია, ის ჩავიდა სტრასბურგში და არა სტრასბურგის სასამართლოში“, - განაცხადა კობახიძემ

შეგახსენებთ, რომ გუშინ „ტვ პირველის“ ეთერში პარლამენტის თავჯდომარემ განაცხადა, რომ „რუსთავი 2“-ის საკითხზე სტრასბურგის სასამართლო მოექცა პოლიტიკური გავლენის ქვეშ.

ანა მებურიშვილი