პოლიტიკა

კონკრეტულ ადგილებში კონდიციონერს არ რთავენ ან ტექნიკური პრობლემის ან სხვა მიზეზის გამო

განათლების მინისტრი ალექსანდრე ჯეჯელავა იმ მშობლებს გამოეხმაურა, რომლებიც უკმაყოფილოები არიან, რომ ეროვნულ გამოცდებზე კონდიციონერებს არ რთავენ.

მინისტრის თქმით, კონდიციონერების გამოუყენებლობას სხვადასხვა მიზეზი განაპირობებს, მათ შორის ტექნიკური პრობლემებიც.

„გამოცდები ძალიან სტრესული საქმეა და სამწუხაროდ, იქაც, სადაც კონდიცირება არის, გულის წასვლა და სხვა სტრესის გამო ძალიან ბევრი ასეთი რამ ხდება, რაც ძალიან სამწუხაროა. სიცხე ნამდვილად არის პრობლემა, თან სამწუხაროდ, ისე მოხდა, რომ სწორედ ეროვნული გამოცდების დაწყებას დაემთხვა ტემპერატურის მნიშვნელოვანი მატება. საგამოცდო ცენტრები ადრე სხვადასხვა ადგილას იყო. ბოლო წლებში დავიწყეთ თავმოყრა, ერთსა და იმავე ადგილებში ტარდება ეროვნული გამოცდები.

იმედი გვაქვს, დროთა განმავლობაში ყველა ჩვენი ცენტრი კონდიცირებული იქნება. რაც შეეხება კითხვას, რომ კონკრეტულ ადგილებში კონდიციონერს არ რთავენ, ზოგან ტექნიკური პრობლემაა, ზოგან სხვა სახის პრობლემაა და სამწუხრაოდ, ისეთი ვითარებაც გვაქვს, როდესაც ვიღაცას ხელს უშლის. ეს უდავოდ არის რაღაც, რის გამოსწორებაზეც ჩვენ უნდა ვიმუშავოთ“,- განაცხადა ჯეჯელავამ.