პოლიტიკა

კომიტეტში შევთანხმდით, რომ ჩვენ მივდივართ საპარლამენტო რესპუბლიკისაკენ - ზვიად ძიძიგური

საპარლამენტო უმრავლესობის წევრის, ზვიად ძიძიგურის თქმით, ახალი კონსტიტუცია საპარლამენტო რესპუბლიკის მოდელზე იქნება მორგებული.

„საკონსტიტუციო კომისიის პირველ სხდომაზე, სადაც არის 70-ზე მეტი ექსპერტი, პოლიტიკოსი, აკადემიური წრეების წარმომადგენელი, გამოცხადდა, რომ ჩვენ მივდივართ საპარლამენტო რესპუბლიკისაკენ. ეს არის ერთადერთი თემა, რომელზეც ვართ შეთანხმებული, რომ ახალი კონსტიტუციის მიხედვით, ჩვენ გვექნება საპარლამენტო რესპუბლიკა. საპარლამენტო რესპუბლიკის პრეზიდენტი არაა აღმასრულებელი ხელისუფლების ხელმძღვანელი, ისაა ზეპარტიული პერსონა, რომელიც პოლიტიკურ საკითხებსა და ვნებათაღელვაზე მაღლა უნდა იდგეს, რომელსაც აქვს მნიშვნელოვანი, მათ შორის სიმბოლური ფუნქციებიც. მაგრამ ძალიან განსხვავდება საპარლამენტო რესპუბლიკის პრეზიდენტის უფლებამოსილებები საპრეზიდენტოს ან ნახევრად საპრეზიდენტოს უფლებამოსილებებისგან. პრემიერ-მინისტრია ძირითადი თავმჯდომარეცა და მინისტრთა კაბინეტის ხელმძღვანელიც, აღმასრულებელი ხელისუფლების მეთაურიც, ამიტომ კონსტიტუცია ამაზე იქნება მორგებული“, - განაცხადა ძიძიგურმა.

საკონსტიტუციო კომიტეტის წევრის განცხადებით, ეჭვი, რომ პრეზიდენტის უფლებამოსილების შესაძლო შეზღუდვა გიორგი მარგველაშვილის წინააღმდეგაა მიმართული, არასწორია.

ძიძიგური აღნიშნავს, რომ კონსტიტუციაში მკაფიოდ უნდა იყოს განსაზღვრული პრეზიდენტის უფლებამოსილებები.

„რაც შეეხება სპეკულაციას, რომ ეს არის პრეზიდენტ მარგველაშვილის წინააღმდეგ მიმართული, ამას კატეგორიულად გამოვრიცხავ, რადგან საკონსტიტუციო ცვლილებები არ შეეხება მარგველაშვილის პრეზიდენტობის პერიოდს. ყველა ვერსია ისეა შეთანხმებული, რომ კონსტიტუციას თუ მივიღებთ წლის ბოლომდე ან მომავალი წლის გაზაფხულზეა მისი მყისიერი ამოქმედება ვერ მოხდება. აქედან გამომდინარე, ვფიქრობ, რომ სწორია, რომ საქართველოს კონსტიტუციაში არ იყოს პარალელური სტრუქტურები, ძალიან მკაფიოდ იყოს განსაზღვრული უშიშროების საბჭოს, საგარეო პოლიტიკის გამართვის საკითხი, აღმასრულებელ ხელისუფლებაში რა დოზით მონაწილეობს პრეზიდენტი და ა.შ.. ეს მხოლოდ და მხოლოდ წაადგება ჩვენ ქვეყანას“, - განაცხადა საპარლამენტო უმრავლესობის წევრმა დღევანდელ პრესკონფერენციაზე.

ძიძიგურის თქმით, ახალი კონსტიტუციის მიღების შემდეგ მნიშვნელოვანი იქნება ვენეციის კომისიის დასკვნა.

ანა მებურიშვილი