სამართალი

კომისიაზე ვხედავთ, თუ რამდენად არასწორად იყო წარმართული გამოძიება, თუ რამდენი ფაქტი იყო დაფარული გარკვეულწილად - სერგო რატიანი

ხორავას ქუჩაზე მოზარდების მკვლელობის საქმეზე შექმნილი დროებითი საპარლამენტო საგამოძიებო კომისიის წევრის, სერგო რატიანის განცხადებით, კომისიის მუშაობამ გამოავლინა, რომ მაღალჩინოსნების, პროკურატურისა და შსს-ის გამომძიებლებსა და პროკურორებს ძალიან სერიოზული პრობლემა ჰქონდათ.

„კომისიის მთელი მუშაობა აჩვენებს, რომ მაღალჩინოსნებს, პროკურატურისა და შინაგან საქმეთა სამინისტროს გამომძიებლებსა და პროკურორებს ძალიან სერიოზული პრობლემა ჰქონდათ და მათ მიმართ იკვეთება გარკვეული სახის პრობლემები", - განაცხადა რატიანმა, რომელიც გამოეხმაურა არასამთავრობოების მოთხოვნას, რომ ხორავას ქუჩის საქმესთან დაკავშირებით, მაღალჩინოსნების მიმართ საქმის ცალკე წარმოება უნდა დაიწყოს.

დეპუტატმა მაღალჩინოსნების პასუხისმგებლობის საკითხზეც ისაუბრა.

„კომისიაზე ჩვენ ვხედავთ და საზოგადოებაც ხედავს, რომ თუ რამდენად არასწორად იყო წარმართული გამოძიება, თუ რამდენი ფაქტი იყო დაფარული გარკვეულწილად. ჩვენ ვხედავთ იმასაც, რომ ფაქტობრივად, ორივე რეკომენდაცია, რომელიც ჩვენ გავეცით, გულისხმობდა იმას, რომ დანაშაული გარკვეულწილად იყო დაფარული. ერთ შემთხვევაში არ იყო აღძრული სისხლის სამართლის საქმე, მეორე შემთხვევაშიც არ იყო ბრალი წაყენებული და ეს ნიშნავს მხოლოდ იმას, რომ აქ იკვეთება სრულიად ცხადად მაღალჩინოსნების პასუხისმგებლობა", - განაცხადა რატიანმა.