სამართალი

კომერციული დავების ვიწრო სპეციალიზაციას განსახილველად 250-მდე საქმე გადაეცა და დღეის მდგომარეობით, ეს რიცხვი განახევრებულია - გიორგი მიქაუტაძე

თბილისის საქალაქო სასამართლოში შექმნილ კომერციული დავების ვიწრო სპეციალიზაციას სექტემბრიდან განსახილველად 250-მდე საქმე გადაეცა და დღეის მდგომარეობით, ეს რიცხვი განახევრებულია, - განაცხადა იუსტიციის უმაღლესი საბჭოს მდივანმა, გიორგი მიქაუტაძემ სასტუმრო "ქორთიარდ მერიოტში", სადაც იუსტიციის უმაღლესი საბჭოს წევრები "საქართველოს ბიზნესასოციაციის" წევრებს ხვდებიან.

როგორც მიქაუტაძემ აღნიშნა, იუსტიციის უმაღლესი საბჭოს ახალი შემადგენლობის შეკრების შემდეგ, პირველი რაც გააკეთეს, რომ მოუსმინეს ბიზნესმენებს და მათ მოსაზრებებს გაჭიანურებულ საქმეებთან დაკავშირებით.

"პირველ ეტაპზე იუსტიციის უმაღლესმა საბჭომ პირველი ნაბიჯი რაც გადადგა, ეს იყო კომერციული დავების მიმართულებით ვიწრო სპეციალიზაციის შექმნა თბილისის საქალაქო სასამართლოს სამოქალაქო საქმეთა კოლეგიაში, სადაც დღეის მდგომარეობით 5 მოსამართლე ახორციელებს საქმიანობას. ამ ვიწრო სპეციალიზაციას გადაეცა განსახილველად დაახლოებით, 250-მდე საქმე საწყის ეტაპზე, ეს იყოს ნახევარ მილიონ ლარზე მეტის ღირებულების დავის საგნით სარჩელები, დღეის მდგომარეობით ეს რიცხვი განახევრებულია. საკმაოდ კარგი შედეგები გაქვს, თუ გავითვალისწინებთ, რომ საქმიანობას შეუდგნენ სექტემბრიდან, ეს ახალი ვიწრო სპეციალიზაციის მოსამართლეები. ეს იყო პირველი ნაბიჯი, თუმცა ჩვენ ამაზე არ შევჩერდებით. მოვუსმენთ ბიზნესმენებს, ჩვენ გვაქვს ჩვენი ხედვები ასევე საკანონმდებლო ცვლილებების მიმართულებით. გვქონდა რამდენიმე შეხვედრა საქართველოს პარლამენტისა და მთავრობის წარმომადგენლებთან", - განაცხადა მიქაუტაძემ.

მისივე თქმით, თანამედროვე ბიზნესგარემო ძალიან სწრაფად ვითარდება და მოსამართლეები უნდა აყვნენ განვითარების ტემპს.

"ვფიქრობთ, რომ ვიწრო სპეციალიზაცია, სადაც დღესდღეობით 5 მოსამართლეა, მოგვცემს იმის საშუალებას, რომ უფრო მარტივად შევძლოთ სწორი ტრენინგების და გადამზადების კურსის დაგეგმვა. დღეის მდგომარეობით, იუსტიციის უმაღლეს სკოლასთან ერთად ჩვენ ვგეგმავთ ასეთ ტრენინგებს კომერციული დავების განმხილველი მოსამართლეებისათვის და ასევე საერთაშორისო პარტნიორებთან ერთად ვფიქრობთ, რომ უცხოეთში სწავლების კურსიც გაიარონ შესაბამისმა მოსამართლეებმა", - განაცხადა მიქაუტაძემ.

ნინო ექვთიმიშვილი