პოლიტიკა

ყოფილ პირველ პირებს სახელმწიფო დაცვა სიცოცხლის ბოლომდე აღარ დაიცავს

პრეზიდენტებს, პრემიერ-მინისტრებსა და პარლამენტის თავმჯდომარეებს უფლებამოსილების ვადის ამოწურვის შემდეგ, სახელმწიფო დაცვა მხოლოდ მომდევნო 1 წლის განმავლობაში დაიცვას.

განცხადება ამის შესახებ სახელმწიფო დაცვის უფროსმა, ანზორ ჩუბინიძემ გააკეთა.

ჩუბინიძის განმარტებით ყოფილი მაღალჩინოსნებისთვის დაცვის გაგრძელება დამოკიდებული იქნება პერსონალურ და პოლიტიკურ გადაწყვეტილებებზე. სახელმწიფო დაცვის სამსახურის ხელმძღვანელი ასევე აცხადებს, რომ სამთავრობო დაცვა იმუშავებს აეროპორტებსა და ე.წ. VIP გასასვლელებში.

„ჩვენ გავაკეთებთ შენიშვნას კანონპროექტში. პრემიერის, პარლამენტის თავმჯდომარის და პრეზიდენტის დაცვა მოხდება გადადგომიდან ერთი წლის განმავლობაში. ხოლო შემდეგ მთავრობის დადგენილებით განისაზღვრება, უნდა მოხდეს თუ არა დაცვის გაგრძელება, ძალოვანი უწყებების დასკვნების მიხედვით ანუ შსს, სუს-ი და სხვა უწყებები გამოიკვლევენ, არსებობს თუ არა საფრთხე და ამის შემდეგ იქნება გადაწყვეტილება მიღებული. ნებისმიერი რისკის შემთხვევაში სდსს-ი მყისიერ რეაგირებას მოახდენს. ვფიქრობთ, რომ საქართველოში კრიმინალური მდგომარეობა მოგვარებულია ასე თუ ისე და ამიტომ ჩვენ უნდა ვიფიქროთ ისე, როგორც ევროპულმა სახელმწიფომ ანუ, სადაც არ არის საჭიროება, დაცვა უნდა მოიხსნას“, - განაცხადა ანზორ ჩუბინიძემ.

კითხვაზე, სახელმწიფო დაცვის დანიშვნა შესაძლოა თუ არა, პოლიტიკური ნიშნით მოხდეს, ჩუბინიძე აცხადებს, რომ ასე ვერ მოხდება.

„დაცვის დანიშვნა პოლიტიკური ნიშნით ვერ მოხდება, ვინაიდან ნებისმიერი სახელმწიფოსთვის სამარცხვინო იქნება, თუკი მის პრეზიდენტს რაიმე საფრთხე დაემუქრება“, - აღნიშნა ანზორ ჩუბინიძემ.

შეგახსენებთ, რომ აღნიშნულ საკანონმდებლო ცვლილებებზე მსჯელობა ცოტა ხნის წინ დაიწყო.