პოლიტიკა

კობა კობიძემ იცის ამ სამსახურის სპეციფიკა და აქვს ხედვა - ეკა ბესელია ე.წ. მოსმენების სამსახურის ახლად არჩეულ ხელმძღვანელზე

პარლამენტის იურიდიულ საკითხთა კომიტეტის თავმჯდომარე, ეკა ბესელია კომენტარი გააკეთა კობა კობიძის ოპერატიულ-ტექნიკური სააგენტოს ხელმძღვანელად დანიშვნაზე. დეპუტატის თქმით, კობიძეს აქვს გამოცდილება და უნარები, რომ ახალ სააგენტოს უხელმძღვანელოს.

„ჩვენ განსაკუთრებული პროცედურა გავწერეთ და ამ პროცედურის სრული დაცვით ავირჩიეთ სამი კანდიდატიდან ერთი. ეს იყო აბსოლუტურად თავისუფალი და ყველა პროცედურის დაცვით ჩატარებული ფარული კენჭისყრა. კობა კობიძემ, რომელსაც ძალიან კარგი გამოცდილება ამ სამსახურში მუშაობის, იცის სპეციფიკა, იცის ახალი კანონმდებლობა, აქვს ხედვა. ჩვენ გვქონდა შესაძლებლობა, კითხვები დაგვესვა და ვრცლად მოგვესმინა მისი მოსაზრებები ამ სააგენტოსთან, მომავალ საქმიანობასთან დაკავშირებით. მნიშვნელოვანია ჩვენთვის, რომ ახალი სააგენტო ახალი ხელმძღვანელით იქნება გარანტი იმისა, რომ იქნება დაცული ყველა ის მნიშვნელოვანი უფლება, რომელიც უკავშირდება უსაფრთხოების თემას, ადამიანის პერსონალური და პირადი სივრცის დაცულობას. პროცედურის დაცვით, ახლა უკვე კომისიის თავმჯდომარე წარუდგენს მას პრემიერ-მინისტრს. დროულად, ვადის და პროცედურების დაცვით მოხდა ახალი სააგენტოს ახალი ხელმძღვანელის არჩევა“, - განაცხადა ბესელიამ.

სუს-ის ინფრომაციით, სპეციალურმა კომისიამ ფარული კენჭისყრის შედეგად 3 კანდიდატიდან არჩევანი გააკეთა კობა კობიძეზე, რომელიც სუს-ის სსიპ საქართველოს ოპერატიულ-ტექნიკური სააგენტოს უფროსის მოადგილედ მუშაობდა.

ანა მებურიშვილი