სამართალი

კობა დავითაშვილი 7 ნოემბერს მისი ცემის ფაქტზე პასუხისმგებლობას მიხეილ სააკაშვილს აკისრებს

„ხალხის პარტიის“ ყოფილი ლიდერი კობა დავითაშვილი 2007 წლის 7 ნოემბერს მისი ცემის საქმეზე თბილისის საქალაქო სასამართლოში დაიკითხა.

სასამართლოზე დავითაშვილმა მომხდარზე პასუხისმგებლობა ექს-პრეზიდენტ მიხეილ სააკაშვილს დააკისრა. როგორც მან აღნიშნა, სწორედ სააკაშვილის დავალებით განხორციელდა მასზე თავდასხმა.

სხდომის დაწყებამდე მედიასთან საუბარში დავითაშვილმა 7 ნოემბრის მოვლენები გაიხსენა.

„თავდასხმა ნახევრად სამხედრო ფორმაში გამოწყობილი ადამიანებმა განახორციელეს, რომლებიც სახეს არ მალავდნენ. ეს არ იყო არც დაკავება, არც დაპატიმრება, ეს იყო პირდაპირ ფიზიკური თავდასხმა. მათ ქონდათ გასაშლელი ლითონის ხელკეტები, რომლითაც პირდაპირ თავს დამესხნენ, ყოველგვარი ახსნა განმარტების გარეშე“,-განაცხადა კობა დავითაშვილმა.

დავითაშვილი დაკითხვაზე დღეს ეტლით მიიყვანეს. მისი განმარტებით, ნერვიულობის ნიადაგზე მას რამდენიმე მძიმე დაავადება აქვს.

კობა დავითაშვილის ცემისა და თავისუფლების უკანონო აღკვეთის ფაქტზე ბრალდებულია ყოფილი პროკურორი ზურაბ ადეიშვილი, შემოსავლების სამსახურის უფროსის ყოფილი მოადგილე დავით ქარდელაძე, ასევე ფინანსთა სამინისტროს სპეცრაზმის ყოფილი უფროსი ედიშერ კობახიძე.

მონიკა დავლიანიძე