სამართალი

კიევის სააპელაციო სასამართლოს შემოქმედი ბიძინა ივანიშვილია - მიხეილ სააკაშვილი

საქართველოს ექს-პრეზიდენტის მიხეილ სააკაშვილის განცხადებით, კიევის სააპელაციო სასამართლოს შემოქმედი, რომელმაც ვიცე-პოლკოვნიკი გია ცერცვაძე წინასწარ პატირმობაში დატოვა - ბიძინა იავნიშვილია.

ამის შესახებ სააკაშვილმა მედიას სასამართლო პროცესის დასრულების შემდეგ განუცხადა.

„ამ სასამართლოს შემოქმედი არ არის უკრაინა, ამ სასამართლოს შემოქმედი რუსეთიც კი არ არის. ამ სასამართლოს შემოქმედი არის ივანიშვილი, რომელმაც მთელი პირადი ინფორმაცია საქართველოს სამხედროებზე გადასცა საქართველოს მტერს ოპერაციების ჩამონათვალით: - თუ ვინ რომელ ბრიგადაში მსახურობდა, ვინ როდის სად იყო და ვინ რაზე შეიძლება დაადანაშაულო. ამაზე მეტი დანაშაული რა უნდა ჩაედინა“,-განაცხადა სააკაშვილმა.

ტელეკომპანია „იმედის“ ჟურნალისტის მიერ დასმული კითხვის საპასუხოდ, თუ რა განსხვავებაა გია ცერცვაძისა და მიხეილ სააკაშვილის პრეზიდენტობის დროს ჯარისკაცების გია კრიალაშვილისა და როინ შავაძის წინააღმდეგ აღძრულ საქმეებს შორის, ექს-პრეზიდენტმა უპასუხა ჟურნალისტს, რომ „ თუ ამ ადამიანებს შორის განსხვავებას ვერ ხედავთ, ეს „იმედის“ პრობლემაა და არა ჩემი“.

„საქართველოს სახელმწიფოს წინააღმდეგ ვინც ხელში აიღო იარაღი, ის არის მოღალატე. თუ თქვენ ვერ ხედავთ განსხვავებას საქართველოს წინააღმდეგ იარაღის ამღების, რუსეთთან მოთანამშრომლე, გრუ-სთან მოთანამშრომლე, მათ აგენტებს შორის და საქართველოს დამცველის შორის-ეს არის „იმედის“ პრობლემა და არა ჩემი. აქ ლაპარაკია ბიჭებზე, რომლებმაც სისხლი დაღვარეს საქართველოს დასაცავად რუსეთისგან. თქვენ მეკითხებით, რომ რა განსხვავებაა მათ შორის? უკაცრავად, საქართველოს წინააღმდეგ ვინც აიღო იარაღი ხელში, ყველა არის საქართველოს მტრის ინტერესის დამცველი და საქართველოს მტერი. კიდევ ერთხელ გიმეორებთ, ნუ აყენებთ შეურაცხყოფას იმ ხალხს, ვინც საქართველოს იცავდა, მათი შედარება ნებისმიერი სხვასთან - ეს არის მცნებების აღრევა“,-განაცხადა სააკაშვილმა.

კიევის სააპელაციო სასამართლომ 15 იანვარს დაკავებული ვიცე-პოლკოვნიკი გია ცერცვაძე წინასწარ პატიმრობაში დატოვა. ამის მიზეზად სასამართლოს პირველი ინსტანციიდან დოკუმენტაციის გადმოცემის დაგვიანება დასახელდა.

გიორგი ცერცვაძის მომდევნო პროცესი 3 თებერვალს გაიმართება.

მონიკა დავლიანიძე