პოლიტიკა

კი გინდათ სერიალების ყურება, მაგრამ არ არის საჭირო ვითარების ზედმეტად გამძაფრება - ეკა ბესელია

საპარლამენტო უმრავლესობის წევრმა ეკა ბესელიამ კაჭრეთში მიმდინარე შეხვედრასთან დაკავშირებით განაცხადა, რომ „ალბათ, განმარტებები გაკეთდება“. კითხვაზე, თუ რა ტიპის შეხვედრაა და რატომ არ მონაწილეობს თავად ამ შეხვედრაში, დეპუტატმა უპასუხა, რომ ეს ორგანიზატორებს უნდა ვკითხოთ.

„მგონი, რომ უმრავლესობის სხდომა არ არის. შესაძლოა, ისეთი ფორმატია, რომ ბიუროს შემადგენლობის მიხედვით იმართება. ალბათ, გაკეთდება განმარტებები. ფორმატზე უნდა ჰკითხოთ, ვინც დაგეგმა შეხვედრა. შესაძლოა, ბიუროს ფორმატის შეხვედრაა აღმასრულებელ ხელისუფლებასთან. ასეთი შეხვედრები იმართებოდა ხოლმე. მე არ ვარ ბიუროს წევრი. მე ნუ მეკითხებით იმას, ვინც აორგანიზებს რაღაც შეხვედრებს",- განაცხადა ბესელიამ.

კითხვაზე, ვინაიდან ის ამ შეხვედრას არ ესწრება, ნიშნავს თუ არა, რომ შესაძლოა, გუნდი ემიჯნებოდეს, ბესელიამ განაცხადა, რომ ზედმეტად ვითარების გამძაფრება საჭირო არ არის.

„კი გინდათ სერიალების ყურება, მაგრამ არ არის საჭირო ვითარების ზედმეტად გამძაფრება“, - განაცხადა ბესელიამ.