პოლიტიკა

ხორავას ქუჩის საქმის შემსწავლელი საპარლამენტო საგამოძიებო კომისიის შექმნით კიდევ ერთხელ ვადასტურებთ, რომ ხელისუფლებას დასამალი არაფერი არ აქვს - ირაკლი კობახიძე

საქართველოს პარლამენტის თავმჯდომარემ ირაკლი კობახიძემ ვაშინგტონში ვიზიტისას თბილისში გამართულ საპროტესტო აქციებთან დაკავშირებით ჰკითხეს. კობახიძემ უპასუხა, რომ ხორავას ქუჩაზე მოკლული მოზარდების საქმესთან დაკავშირებული საპროტესტო აქციებმა გამოავლინა ბოლო წლებში სამოქალაქო საზოგადოებისა და პოლიტიკური კულტურის პროგრესი საქართველოში.

„ამ საპროტესტო აქციებმა აჩვენა, რომ საქართველოში არა მხოლოდ სამოქალაქო საზოგადოება განვითარდა, არამედ პოლიტიკური კულტურაც ჩამოყალიბდა. ჩვენ ამ კუთხით წარსულში გვქონდა დრამატული პრობლემები. მაშინ საპროტესტო აქციებისა და საზოგადოების პროტესტის შედეგად არცერთი მაღალჩინოსანი თანამდებობას არ ტოვებდა. ახლა ამ საპროტესტო აქციებზე მთავარი მოთხოვნა გამოძიების სწორად წარმართვა იყო. დემონსტრანტები მიიჩნევდნენ, რომ გამოძიებაზე ზეწოლა ხორციელდებოდა. სწორედ აქციების ფონზე თანამდებობა დატოვა გენერალურმა პროკურორმა. ამან კიდევ ერთხელ დაამტკიცა, რომ ჩვენ პოლიტიკური კულტურის თვალსაზრისით მნიშვნელოვან პროგრესს მივაღწიეთ“, – განაცხადა კობახიძემ ატლანტიკურ საბჭოში შეხვედრის დროს.

მისივე თქმით, საქართველოში საზოგადოება ძალიან მგრძნობიარეა ადამიანის უფლებების შელახვის ფაქტების მიმართ, თუ მათ ამის შესახებ რაიმე ეჭვი უჩნდებათ.

„ჩვენ ვაფასებთ ამას, ვაფასებთ ხალხის ასეთ მაღალ მგრძნობელობას ადამიანის უფლებების დარღვევის სავარაუდო ფაქტებისადმი. ასევე აღსანიშნავია, რომ მიმდინარე აქციების დროს ჩვენ შევქმენით საპარლამენტო საგამოძიებო კომისია, რომელიც ამ საქმეს განიხილავს. ასეთი რამ პირველად მოხდა საქართველოში, როცა მკვლელობის კონკრეტულ საქმეზე პარლამენტში საგამოძიებო კომისია იქმნება და ამ კომისიაში უმრავლესობის სახით ოპოზიციაა წარმოდგენილი. ამით კიდევ ერთხელ ვადასტურებთ, რომ ხელისუფლებას დასამალი არაფერი არ აქვს, არამედ პირიქით, – ხორავას ქუჩაზე მომხდარი მკვლელობის გამოძიება სწორედ ჩვენ ინტერესებში შედის“, – განაცხადა კობახიძემ.