პოლიტიკა

ხორავას ქუჩის საქმის შემსწავლელი საპარლამენტო კომისია არასამთავრობოებისა და სახალხო დამცველის აპარატის წარმომადგენლებს ხვდება

ხორავას ქუჩაზე მოზარდების მკვლელობის საქმის შემსწავლელი დროებითი საპარლამენტო საგამოძიებო კომისიის წევრები არასამთავრობო ორგანიზაციებისა და სახალხო დამცველის აპარატის წევრებს ხვდებიან. შეხვედრაზე განიხილავენ ორ რეკომენდაციას, რომელზეც კომისიამ მომავალში უნდა იმსჯელოს.

„საქართველოს ახალგაზრდა იურისტთა ასოციაციის“ თავმდჯოამარემ, სულხან სალაძემ შეხვედრის დაწყებამდე ჟურნალისტებს განუმარტა, რომ რეკომენდაციები განკუთვნილია საგამოძიებო უწყებებს და ეხება ორ ფაქტს, კერძოდ, საქმეში მესამე დანის არსებობის შესაძლებლობასა და კიდევ ერთ პირთან დაკავშირებით გამოძიების დაწყებას.

„დღეს კომისია ისაუბრებს კონკრეტულ რეკომენდაციებზე, რომლითაც უკვე მიმართავს შესაბამისი პროცედურების გავლის შემდეგ შესაბამის უწყებებს. ეს რეკომენდაციები გულისხმობს გამოძიების დაწყებას ორ ფაქტთან დაკავშირებით. პირველი ეხება ერთ-ერთი პირის დაჭრის ფაქტს ამ ინციდენტის დროს და ეს საქმე მნიშვნელოვანია იმ თვალსაზრისით, რომ ეს ადასტურებს ჩხუბში მესამე ცივი იარაღის არსებობას, იმ ფონზე, რომ გამოძიების ოფიციალური ვერსიით საქმეში მხოლოდ ორი დანა ფიგურირებს. ამჯერად, შეიძლება დადასტურებულად ითქვას, რომ მინიმუმ კიდევ ერთი ცივი იარაღი იყო საქმეში. გარდა ამისა იყო მეორე რეკომენდაციაც, რომელიც ეხება კიდევ ერთ პირთან დაკავშირებით გამოძიების დაწყებას. ვფიქრობ, ასევე კომისია დღეს ისაუბრებს იმ საქმიანობაზე, რომელიც მათ აქამდე გასწიეს", - განაცხადა სალაძემ.

სალაძემ აღნიშნა, რომ აინტერესებს კომისიის წევრთა შეხედულება ხორავას ქუჩაზე მომხდარი მკვლელობის მომდევნო დღეებში განვითარებულ მოვლენებსა და საწყის ეტაპზე გამოძიების პროცესში შექმნილ „ჩავარდნაზე“.

„კიდევ ერთი საკითხი, რომელიც მე პირადად მაინტერესებს, ეხება უშუალოდ შემთხვევის შემდეგ რამდენიმე დღის განმავლობაში განვითარებულ მოვლენებს. იყო გარკვეული ჩავარდნა. როცა კომისია იქმნებოდა, ერთ-ერთი მთავარი მიზანი, რომელიც მას ჰქონდა, იყო იმის დადგენა, ხომ არ იყო დაშვებული რაიმე შეცდომები გამოძიების დროს. ამაზე კომისიას გარკვეული შეხედულებები უკვე აქვს. კითხვები ლეგიტიმურია ამ მხრივ. თუკი ამხელა გახმაურებულ საქმეზე ამდენი ტიპის პრობლემა არსებობს, შეგვიძლია მარტივად წარმოვიდგინოთ, სხვა ჩვეულებრივი გამოძიების დროს რამდენი პრობლემა შეიძლება იყოს", - განაცხადა სალაძემ.